گەشتە ئاسمانیەکان دەستپێدەکەنەوە

وەزارەتی گواستنەوەی عێراق ڕایگەیاند، لەسەر ڕاسپارەدەی محەمەد شیاع سودانی سەرۆك وەزیران، ڕۆژی دوشەممە 30ـی (کانونی یەکەم/12)ی ئەمساڵ، گەشتەکانی نێوان عێراق و لوبنان دەستپێدەکەنەوە، هەروەها  بەرێوەبەری گشتی هێلی ئاسمانی عێراق دەڵێت، "هەمو ئامادەکارییەکی تەکنیکی و هونەری و لۆجستی بۆ دەستپێکردنەوەی گەشتەکان كراوە".
وەزارەتی گواستنەوەی عێراق، ئەمڕۆ شەممە لە ڕاگەیەندراوێكدا بڵاویكردەوە، لەسەر ڕاسپاردەی محەممەد شیاع سودانی سەرۆک وەزیرانی عێراق، بۆ ئاسانکاریی کردن لە گەڕانەوەی ئەو هاوڵاتییە لوبنانییانەی كە ئێستا لە عێراقن، وەزیری گواستنەوە بڕیاریدا ڕۆژی دوشەممە داهاتو، گەشتە ئاسمانییەکانی نێوان عێراق و لوبنان دەستپێبکەنەوە

لایخۆیەوە مەناف عەبدولمونعم، بەرێوەبەری گشتی هێلی ئاسمانی عێراق ڕایگەیاند، هەمو ئامادەکارییەکی تەکنیکی و هونەری و لۆجستی بۆ دەستپێکردنەوەی گەشتەکانی نێوان عێراق و لوبنان کراوە. 
دەشڵێت، "گەشتەکانی نێوان بەغدا و بەیروت لە 1ـی (کانونی دوەم/1)ی 2025 دەستپێدەکەنەوە.

هاوكات کۆمپانیای گشتی هێڵی ئاسمانی عێراقییش، داوای لە گەشتیارانی کرد کە سودمەندبن لە گەڕانەوەی کارەکانی ئەو هێڵە کە حەوت گەشت لە هەفتەیەکدا ئەنجامدەدات، هەروەها ژمارەی گەشتەکانیش بە پێی قەبارەی خواست و هەڵسەنگاندنی بارودۆخ دەگۆڕێت.