گواستنەوەی مووچە دەسپێدەکات

پڕۆژەی هەژماری من رای دەگەیەنێت، ژمارەی ATMكان روو لە زیادبوونە، بەمنزیكانەش مووچەخۆران دەتوانن دەست بە گواستنەوەی مووچەكانیان لە بانكێكەوە بۆ بانكێكی تر بكەن.
بەپێی دواین راپۆرتی داتا و زانیاریی تایبەت بە پڕۆژەی "هەژماری من" 99%ی مووچەخۆران لە پڕۆژەكە تۆمار كراون، ئێستە زیاتر ملیۆنێك مووچەخۆر بەدیجیتاڵی مووچە وەردەگرن.
بەپێی داتاكانی هەژماری من كە تایبەت دەست "وشە" كەوتووە، تێدا هاتووە تا ئەمڕۆ ملیۆنێك و 16 هەزار و 290 مووچەخۆر سوودمەندی هەژماری من بوونە، لەو ژمارەیە 398 هەزار و 293 فەرمانبەری مەدەنی، لەگەڵ 313 هەزار و 844 خانەنشینی، هەروەها 237 هەزار و 763 سەربازی و 66 هەزار و 390 لە بنەماڵەی شەهیدان.
هەژماری من ئەوەشی بۆ مووچەخۆران ئاشكرا كردووە، بەمنزیكانە پرۆسەی گواستنەوەی هەژماری من لە بانكێكەوە بۆ بانكێكی تر دەست پێ‌ دەكات، فەرمانبەر دەتوانێت بانكەكەی بگۆڕێت، لە هەمان كاتدا ئێستە لەرێی بەكارهێنانی ئامێری بانكێكی تر مووچەكەی وەربگرێت.