زانیاری نوێ لەبارەی مووچەی مانگی حەوت گەیشت

ئەمڕۆ تەواوی لیستی مووچەی مانگی حەوت لە دارایی هەرێمی کوردستان ئامادە دەکرێت. وەزارەتەکەش جەخت دەکاتەوە، کە: "سەرەتای هەفتەی داهاتوو لیستی مووچەی مانگی حەوت دەگاتە دەستی ژمێریاریی عێراقی فیدڕاڵ."

سەرچاوەیەكی ئاگادار لە وەزارەتی دارایی هەرێمی كوردستان، راگەیاند: "لیستی مووچەی فەرمانبەران و مووچەخۆران و هێزە ئەمنییەکانی مانگی حەوتی وەزارەت و فەرمانگەکان بە سیدی ئامادەیە و تەواو بووە و ئەمڕۆش بە کاغەز و چاپکراو ئامادە دەبێت."

مانگانە ئەو لیستی مووچەیەی، كە بۆ دارایی فیدراڵ دەنێردرێت، پێکهاتووە لە لیستی مووچە بە سی دی و بە کاغەز.

سەرچاوەکەی دارایی جەختی کردەوە: "لیستی ئەو مانگە خێراتر و وردتر کاری بۆ کراوە، بۆ ئەوەی هیچ تێبینییەک لەلایەن دارایی فیدڕاڵ نەبێت، هیچ بیانوویەک ناهێڵین، کە ببێتە هۆی دواخستنی مووچەی مانگانەی مووچەخۆران."

سەرچاوەکەی دارایی دڵنیایی دا، کە: "بەئەگەری زۆرەوە ئەمڕۆ بۆ بەغدای دەنێرین و سەرەتای هەفتەی داهاتوو لیستی مووچەی مانگی حەوت دەگاتە دەستی ژمێریاریی عێراقی فیدڕاڵ."

مانگی پێشوو، لە ڕۆژی 27ی6ی 2024، وەزارەتی دارایی لیستی مووچەی مانگی شەشی بۆ بەغدا نارد و ڕۆژی شەممە 29ی6ی2024 لیستەکە گەیشتە دارایی فیدراڵ و پاشان رۆژی 4ی7ی2024، وەزارەتی دارایی عێراق بڕی 231 ملیاری دیناری تەمویلی مووچەخۆرانی مانگی شەشی بۆ هەرێمی كوردستان رەوانە كرد و دەست بە دابەشكردنی مووچە كرا.

بەپێی نووسراوێكی وەزارەتی دارایی حكوومەتی هەرێمی كوردستان،  وەزارەتەكان ئاگادار كراونەتەوە، كە پێش 10ی هەموو مانگێك لیستی مووچەیان ئامادە بێت و تیایدا هاتووە: "ئاگادارتان دەکەینەوە، بە ناردنی لیستی مووچەی فەرمانبەران بۆ بەڕێوەبەرایەتیی گشتیی ژمێرکاریی وەزارەتمان پێش 10ی هەموو مانگێک، دوای وردبینیکردنی لە لایەن گەنجینەکان، هەروەها پێش 10ی هەر مانگێک دەبێت وەزارەت و فەرمانگەکان تەرازووی پێداچوونەوەی مانگانە بۆ وەزارەتی دارایی بنێرن."

پێشتر د. محەمەد زراری، بەڕێوەبەری گشتی له دیوانی چاودێریی دارایی هەرێمی کوردستان، ڕاگەیاند: "مانگانە لیستی مووچەی فەرمانبەران و مووچەخۆران و هێزە ئەمنییەکان لای ئێمە وردبین دەکرێت و پاشان بۆ بەغدا دەنێردرێ."

لای خۆیەوە د. شێروان دووبەردانی، ئەندامی پەرلەمانی عێراق، ڕاگەیاند: "بڕیارە هەفتەی داهاتوو لە عێراق دەست بە دابەشکردنی مووچەی مانگی حەوت بکرێت، بەدڵنیایی دوای گەیشتنی لیستی مووچەخۆرانی هەرێمی کوردستان بە دارایی عێراق، ڕاستەوخۆ وردبینی دەست پێدەکات و پاشان تەمویل دەنێردرێ."

ئاماژەی بەوەش دا، لە مانگی ڕابردوودا دارایی عێراق لە 23ی6 دەستی به دابەشکردنی مووچەی مانگی شەشی دامودەزگاکانی عێراق کرد.