ڕێککەوتن نزیکە

هەڵمەتە سەربازییەكەی ئەمەریكا و ئیسرائیل لە دژی ئێران پێی ناوەتە شەشەم هەفتە و بەردەوامە، هەر لە سەرەتای دەست پێكردنی هەڵمەتەكەوە سەرۆكی ئەمەریكا ماوەی چوار بۆ شەش هەفتەی بۆ دیاری كرد و چەند ئامانجێكیشی دەستنیشان كرد، دوێنێ ترەمپ باسی 48 سەعاتی وەك دوا وادە بۆ كردنەوەی گەرووی هورمز بۆ ئێران دیاری كرد و ئەمڕۆش هەڕەشەی توندتری كرد، دوا جار باسی ئەگەری رێككەوتن تا سبەی سێشەم دەكات.
دۆناڵد ترەمپ سەرۆكی ئەمەریكا بە "فۆكس نیوز"ی راگەیاند، پێم وایە تا سبەی دەگەین بە رێككەوتن، ئەگەر ئەوە روونەدات، هەموو شتێك لە ئێران دەكەینە ئامانج، دەست بەسەر نەوتی ئێراندا دەگرین.
ترەمپ باسی بوونی هەلێكی بۆ رێككەوتن كرد، هاوكات وریایی لە نەگەیشتن بە رێككەوتن دا، بەوەی پەنا بۆ بژارەی تر دەبەن، وەك ئاماژەیەك بۆ هێرشی بەهێزتری سەربازی، گوتی، پێم وایە تا سبەی بە رێككەوتن بگەین و ئەگەر ئەوەش نەبوو، هەموو شتێك لە ئێران دەكەینە ئامانج.  
ئەمڕۆ یەكشەم ترەمپ وەك هەموو جارێك لە لاپەڕەی خۆی لە ترووس سۆشیال نووسیویەتی، ئەو گەرووە نەفرەتییە بكەنەوە ئەی ریسوا و شێتەكان، ئەگینا لە دۆزەخدا دەتانژیێنین. 
دوێنێ شەممە دۆناڵد ترەمپ سەرۆكی ئەمەریكا لە باسی بوارە 10 رۆژییەكەی بە ئێرانی دابوو بۆ كردنەوەی گەرووی هورمز لە پۆستێك لە ترووس سۆشیال نووسی، كاتەكە بەسەر دەچێت و تەنیا 48 سەعات ماوە بەر لەوەی دەرگەی دۆزەخێكی گەورە بە روویاندا بكرێتەوە.