كۆریای باشوور: هەفتەی داهاتوو ئەگەری دیدارێكی ترەمپ و كیم جۆنگ ئون لە ئارادایە
وەزیری یەكگرتووی كۆریای باشوور، چۆنگ دۆنگ یۆنگ، ڕۆژی هەینی، ئەگەری بەستنی دیدارێكی لەنێوان دۆناڵد ترەمپ، سەرۆكی ئەمەریكا و كیم جۆنگ ئون، ڕێبەری كۆریای باكوور، لە هەفتەی داهاتوودا ئاشكرا كرد.
چۆنگ دۆنگ یۆنگ گوتی، كۆریای باكوور گرنگییەكی زۆر بە ئەمەریكا دەدات و چەندین ئاماژە هەن كە ئەگەری بەهێزی بەستنی دیدارێكی لەو جۆرە دووپات دەكەنەوە.
ناوبراو پێشبینی كرد، دیدارەكە لە پەراوێزی ئەو سەردانەدا ئەنجام بدرێت كە بڕیارە سەرۆكی ئەمەریكا ڕۆژی چوارشەمی داهاتوو بۆ كۆریای باشوور ئەنجامی بدات، بە مەبەستی بەشداریكردن لە كۆبوونەوەی كۆڕبەندی هاوكاریی ئابووریی ئاسیا و زەریای هادی.
لەلایەكی ترەوە، میدیاكانی ئەمەریكا بڵاویان كردووەتەوە كە بەرپرسانی ئیدارەی ترەمپ بە شێوەیەكی نافەرمی گفتوگۆیان لەبارەی ڕێكخستنی دیدارێكی لەو شێوەیە كردووە. جێی باسە، دوایین دیداری نێوانیان لە ماوەی یەكەم خولی سەرۆكایەتیی ترەمپدا بوو لە ساڵی 2019.
شایەنی باسە، ترەمپ پێشتریش چەند جارێک ئارەزووی خۆی بۆ ئەنجامدانی دیدارێكی نوێ لەگەڵ كیم دەربڕیوە و ئاماژەی بە ئەگەری ڕوودانی لەمساڵدا كردبوو.
وەڵام بدەوه