پوتن ئامادەیە بۆ ڕاگرتنی شەڕ

ڤلادیمێر پوتن، سەرۆکی ڕوسیا و ستیڤ ویتکۆف، نوێنەری سەرۆكی ئەمریکا بۆ ڕۆژهەڵاتی ناوەڕاست دوێنی هەینی بۆ ماوەی سێ كاتژمێر كۆبونەوە و وتەبێژی كۆشكی سەرۆكایەتی ڕوسیا (کرێملین)ش دەڵێت، "دانوستانی بنیاتنەریان ئەنجامداوە و پوتن ئامادەیی ڕوسیای بۆ دانوستان لەگەڵ ئۆکرانیا بەبێ مەرجی پێشوەختە دەربڕیوە".

بەگوێرەی ئاژانسی ئینتەرفاکس-ی ڕوسی، دیمیتری پیسکۆڤ وتەبێژی کرێملین ئەمڕۆ شەممە ڕایگەیاندوە، پوتن و نوێنەری سەرۆكی ئەمریکا سێ کاتژمێر دانوستانی بنیاتنەریان لە مۆسکۆ ئەنجامداوە کە باس لە ئەگەری دەستپێکردنەوەی دانوستانی ڕاستەوخۆی نێوان مۆسکۆ و کیێڤ کراوە.

ئاماژەی بەوەشكرد، پوتن لە میانی دیدارەکەیدا لەگەڵ نوێنەری سەرۆكی ئەمریکا، ئامادەیی ڕوسیای بۆ دانوستان لەگەڵ ئۆکرانیا بەبێ مەرجی پێشوەختە پشتڕاستکردوەتەوە.

وتەبێژەكەی کرێملین باسی لەوەشكردوە، سەرۆكی ڕوسیا پێشتر چەند جارێکی دیكە باسی ئەو بابەتەی کردوە و ئامادەیی دەربڕیوە
لایخۆیەوە دۆناڵد ترەمپ، سەرۆکی ئەمریکا ڕایگەیاند، ڕوسیا و ئۆکرانیا زۆر لە ڕێککەوتنێک نزیک بونەتەوە، ئێستا دەبێت هەردولا لە بەرزترین ئاستدا کۆببنەوە بۆ ئەوەی یەکلایی بکەنەوە.

ئەوە لەكاتێكدایە، ویتکۆف ڕۆژی هەینی گەیشتە مۆسکۆ و بۆ جاری چوارەم لەگەڵ پوتن کۆبوەوە، ئەوەش لە کاتێکدایە كە ئەمریکا بەردەوامە لە هەوڵەکانی بۆ کۆتاییهێنان بە شەڕی ڕوسیا و ئۆکرانیا.