لە چوارچێوەی هەوڵ و گرنگیدانی بەردەوامی كابینەی نۆی حكوومەتی هەرێمی كوردستان و بە پشتیوانیی ڕاستەوخۆی مەسروور بارزانی سەرۆك وەزیران، ڕەزامەندیی فەرمی بۆ پێنج پڕۆژەی ستراتیجیی ئاو لە هەرێمی كوردستان وەرگیرا و سەرجەم ئامادەكارییە ئەندازیاری و كارگێڕییەکانیش بۆ جێبەجێكردنیان كۆتاییان پێ هات.
وردەکاریی پڕۆژەکان
بە گوتەی ئاری ئەحمەد، بەڕێوەبەری گشتیی ئاوی هەرێمی كوردستان، ئەم پاكێجە خزمەتگوزارییە ستراتیجییە پڕۆژەکانی خوارەوە لەخۆ دەگرێت:
سۆران: دابینكردنی ئاوی خاوێن بۆ دانیشتووانی شار و ناوچەکە.
خەبات: پڕۆژەی دابینكردنی ئاوی خاوێن بۆ دانیشتووان و ناوچەکە.
كەلار: دابینكردنی ئاوی خاوێن بۆ دانیشتووانی شار و دەڤەرەکە.
كۆیە: پڕۆژەی دابینكردنی ئاوی خاوێن بۆ دانیشتووانی ناوچەکە.
قەندیل - پیرمام - شەقڵاوە: پڕۆژەیەکی تایبەت بە فراوانكردنی تۆڕی ئاو لەم ناوچەیەدا، کە بە سەرکەوتوویی جێبەجێکردنی، دۆخی ئاو لە تەواوی ئەو دەڤەرانەدا بە تەواوی سەقامگیر دەكات.
ئامادەکاری و ئاراستەی کارکردن
كابینەی نۆ ڕێگەی نەدا ئاستەنگە داراییە هەنووكەییەكان ببنە ڕێگر لە بەردەم نەخشەڕێگەی داهاتوو، بۆیە سەرجەم دیزاین و لێكۆڵینەوە پێویستەكانی ئەم پڕۆژانەی لە 100% تەواو كردووە.
پڕۆژەکان ئامادەن تا لەگەڵ فەراهەمبوونی شایستە داراییەكان لەلایەن حكوومەتەوە، دەستبەجێ بە كردار بچنە بواری جێبەجێكردنەوە.
ناوچەکانی سۆران، خەبات، كەلار، كۆیە و سنووری گەشتیاریی پیرمام و شەقڵاوە، لە ماوەی ساڵانی ڕابردوودا بەهۆی گۆڕانی كەشوهەوا، كەمبارانی و فراوانبوونی خێرای دانیشتووان، لە وەرزی هاویندا ڕووبەڕووی گوشاری كەمئاوی دەبوونەوە.
بە تەواوبوونی ئەم پڕۆژانە لە قۆناغی داهاتوودا، ژێرخانێكی بەهێزی ئاو بۆ چەندان دەیە فەراهەم دەبێت و خزمەتێكی گەورە بە سەتان هەزار هاووڵاتیی ئەو ناوچانە دەگەیەنێت.
#kurdistanpress
وەڵام بدەوه