نیویۆرك تایمز به‌شێك له ناوه‌ڕۆكی ده‌ره‌نجامی كۆبوونه‌وه‌كه‌ی دوێنێی نێوان ئێران و ئه‌مه‌ریكای ئاشكرا كرد و گوتی، ئێران پێشنیازی ئه‌وه‌ی به ئه‌مه‌ریكا داوه له به‌رانبه‌ر وه‌به‌رهێنانی هاوبه‌ش، ئاماده‌یه رێژه‌ی پیتاندنی یۆرانیۆم كه‌م بكاته‌وه.
وا دیاره تیمی ئێرانی به‌ر له كۆبوونه‌وه‌كه‌ی دوێنێ كه گه‌ڕی دووه‌می دانوستانه‌كان بوو، به ئه‌مه‌ریكییه‌كانیان گوتووه تاران ئاماده‌یه له‌سه‌ر كه‌مكردنه‌وه‌ی رێژه‌ی پیتاندنی یۆرانیۆم رێككه‌وتن بكات و بیگه‌یه‌نێته هه‌مان ئاستی رێگه‌پێدراوی ساڵی 2015 كه 3.67% بوو .
له ماوه‌ی ساڵانی رابردوودا ئێران رێژه‌كه‌ی گه‌یاندووه‌ته سه‌رووی 60% و هێنده‌ی نه‌ماوه به ئاستی به‌رهه‌مهێنانی بۆمبی ئه‌تۆمی بگات.
عه‌باس عێراقچی وه‌زیری ده‌ره‌وه‌ی ئێران كه سه‌رۆكی شاندی ئێرانی بۆ دانوستانه، دوای ته‌واوبوونی گه‌ڕی دووه‌می دانوستانه‌كان كه رۆمای پایته‌ختی ئیتاڵیا به‌ڕێوه‌چوو، گوتی ده‌ره‌نجام ئه‌رێنی بووه و بڕیار دراوه ئه‌مجاره پسپۆڕان و شاره‌زایان ده‌ست به گفتوگۆكانیان بكه‌ن.
بڕیاره رۆژی چوارشه‌م لیژنه ته‌كنیكی و پسپۆڕه‌كان دانوستانیان هه‌بێت و گه‌ڕی سێیه‌می دانوستانیش كه‌وتووه‌ته شه‌مووی داهاتوو.
چاودێرانی نێوده‌وڵه‌تی پێیان وایه گه‌یشتنی ئه‌نجامی دانوستانه‌كان به‌و قۆناغه ده‌یسه‌لمێنێت هه‌ردوو لایه‌ن له‌سه‌ر هه‌ندێك شتی سه‌ره‌كی به رێككه‌وتن گه‌یشتوون.
ستیڤ ویتكاف سه‌رۆكی شاندی ئه‌مه‌ریكا، چه‌ند جارێك گوتبووی پێویسته ئێران چالاكییه ئه‌تۆمییه‌كان به ته‌واوی رابگرێت، به‌ڵام وا دیاره ئه‌و هه‌ڵوێستانه‌ی ئه‌و زیاتر بانگه‌شه بوون و ویستوویانه گوشاری زیاتر بخه‌نه سه‌ر ئێران بۆ ئه‌وه‌ی به زۆربه‌ی داخوازییه‌كانی ئه‌مه‌ریكا رازی ببێت.
یه‌كێك له‌و پێشنیازانه ئه‌وه‌یه به وه‌به‌رهێنانی هاوبه‌شی ئێران له‌گه‌ڵ وڵاتانی عه‌ره‌بی یان ئه‌مه‌ریكا درێژه به چالاكییه ئه‌تۆمی و پڕۆژه‌كانی تر بدرێت، ئه‌مه‌ش چوارچێوه‌ی پلانه‌كه زیاتر گره‌نتی ده‌كات و به‌هۆی ئه‌و چاودێرییه چڕه‌ی ده‌خرێته سه‌ری، چیتر گومانی ئه‌وه نایه‌ته كایه‌وه چالاكییه ئه‌تۆمییه‌كان بۆ مه‌به‌ستی جه‌نگ و به‌رهه‌مهێنانی بۆمب بقۆزرێته‌وه.
له‌لایه‌كی تره‌وه رۆژنامه‌ی ئه‌كسیۆسیش بڵاوی كرده‌وه كه ده‌ره‌نجامی گفتوگۆكه‌ی دوێنێی نێوان ئێران و ئه‌مه‌ریكا زۆر ئه‌رێنی بووه، میدیاكانی ئێرانیش باسیان له سه‌ركه‌وتنی دانوستانه‌كان كردووه.
ده‌رده‌كه‌وێت ئامانجی ئه‌مه‌ریكا ئه‌وه نییه به ته‌واوی كۆتایی به چالاكییه ئه‌تۆمییه‌كان بێنێت، به‌ڵكو ده‌خوازێت هه‌مان رێژه‌ی 2015 بمێنێته‌وه به‌و مه‌رجه‌ی ئێران له زۆر بواری تردا سازش بكات و هاوشێوه‌ی رێككه‌وتنی پێشوو، داهاته‌كه بۆ خۆپڕچه‌ككردن و په‌ره‌پێدانی تیرۆر و پشێوی نانه‌وه له ناوچه‌كه نه‌قۆزێته‌وه، سه‌رجه‌م هه‌نگاوه‌كان له ژێر كۆنترۆڵی ئه‌مه‌ریكادا بمێننه‌وه و هه‌ر كاتێك زانی ئێران سنووره‌كه ده‌به‌زێنێت، خێرا راستی بكاته‌وه
ناوەڕۆکی کۆبونەوەی ئەمریکا و ئێران بڵاوکرایەوە
1رۆژ پێش ئێستا |
KurdistanPress  |
KurdistanPress
کوردستان پڕێس سەرچاوەیەکى گرنگ بۆ بینینى نوێترین هەواڵى سیاسیى , کۆمەڵایەتى,لە هەرێمی کوردستان ,ئەوروپا ئێمە فۆکس دەخاینە سەرئەوبابەتانەى کوردانەن و پەیوەندیان هەیە بە ئایندە و داهاتووى گەلەکەمان , ئامانجان بڵاوکردنەوەى بابەتى ڕۆشنبیرى و چەسپاندنی دیموكراتی, کارەنمان بڵاو دەکەینەوە لەڕیگەى ویب سایت و سۆشیال میدا لەئیستادا تەنیا بەزمانى کوردى بابەتەکانمان بڵاو دەکەینەوە لەناوخۆى کوردستان و ئەوروپا لە داهاتووى نزیک بەزمانى تریش کارەکانمان بڵاو دەکەینەوە ئامانجمان ئەوەیە ببینە سەرچاوەیەکى راست و گرنگ بۆ گەیاندنى هەوڵ بۆهەواداراکانمان بەپێى یاساکانى ڕۆژ نامەوانى , ئێمە لەڕێگەى لەتۆڕە کۆمەڵایەتیەکانمان و ویب سایتەکەمان بابەتەکانمان بڵاو دەکەینەوە
وەڵام بدەوه