كارۆخ خۆشناو، شارەزا لە سیاسەتی ئەمریكا، رایگەیاند، بەدڵنیاییەوە پرسی دەستپێكردنەوە بە هەناردەكردنەوەی نەوتی هەرێمی كوردستان، هەروەها گرفتی مووچە، كە ساڵانێكە لەنێوان حكوومەتی هەرێمی كوردستان و عێراقدا هەیە، لە ئەمریكا و لەنێو گفتوگۆی نێوان سەرۆكی ئەمریكا و سەرۆكوەزیرانی عێراق، بەرهەمی سەردانی مەسرور بارزانی، سەرۆكی حكوومەتی هەرێمی كوردستانە بۆ واشنتۆن لە مانگی نیسانی رابردوودا.
گوتیشی: ”ئەو باكگراوندەی كە پێویست بووە ئیدارەی بایدن و ئەنتۆنی بلینكن، وەزیری دەرەوەی ئەمریكا بیزانێت ئەوە بوو، لە سەردانەكەی مەسرور بارزانی، سەرۆكوەزیرانی هەرێمی كوردستان لە كۆتایی مانگی نیسان و سەرەتای مانگی ئادار لە هەموو دۆسییەكاندا نەوت و تەواوی كێشەكانی دیكە لە مووچە و هەرچی هەبووە، ئەو زانیارییانە بە بەڵگە و دۆكیۆمێنت خرانە بەردەم ئەمریكا، لەسەر بنەمای ئەوەش، دۆسییەكان ئێستا لەگەڵ محەمەد شیاع سوودانی، سەرۆكوەزیرانی عێراق باس كراون، بەتایبەتی هەناردەكردنەوەی نەوت و چارەسەركردنی گرفتی یەكجارەكیی مووچە، لەبەرئەوە هەموو ئەوانە بەرهەمی ئەو سەردانەن كە ئێستا خەڵكی كوردستان لە دۆخێكی باشتردان.“
ئەو شارەزایە لە سیاسەتی ئەمریكا، جەختی لەسەر ئەوە كردەوە، هەر ئەوكات وەزیری دەرەوەی ئەمریكا، ئیدارەی جۆبایدنی بۆ داوا و مافە رەواكانی خەڵكی كوردستان دووپات كردەوە و رایگەیاند، كە ئەوان لەگەڵ هەرێمێكی بەهێزدان، ئەوەی لەبەردەم سەرۆكوەزیرانی هەرێمی كوردستاندا گوت: ”جێگای خۆشحاڵییە ئەو سەردانەی سەرۆكوەزیران ئێستا رەنگدانەوەی باشی لەسەر سەردانەكەی سوودانیدا هەبووە، بۆ كۆتاییهێنان بە هەموو ئەو گرفتانەی، كە لەنێوان هەولێر و بەغدا هەن.“
وەڵام بدەوه