دادوەرێکی بەناوبانگی ئەمریکی بەیاسا پشتگیری ھەرێمی کوردستان دەکات

دادوەر ستیڤن شوێبڵ، لە شیكارێكی یاسایی گرنگدا، پشتگیریی تەواوی مافە دەستوورییەكانی حكوومەتی هەرێمی كوردستان دەكات لەبارەی بەرهەمهێنان و بەڕێوەبردنی كەرتی نەوت و گاز. ئەم بۆچوونەی دادوەر شوێبڵ كە پشتی بەستووە بە تێگەیشتنێكی ورد لە یاسای نێودەوڵەتی و دەستووری عێراق. دووپات لەسەر مافی ڕەوا و دەسەڵاتی یاسایی و دەستووریی حكوومەتی هەرێم دەكاتەوە بۆ بەڕێوەبردنی سەرچاوە نەوتی و گازییەكانی.

شوێبڵ بە وردی دەستووری عێراقی ساڵی 2005 شی دەكاتەوە و دووپات لەوە دەكاتەوە، هەرێمەكان، وەك هەرێمی كوردستان، دەسەڵاتی بەڕێوەبردنی سامانە سروشتییەكانیان هەیە لەڕێی لێكدانەوەی مادەكانی 110 و 114 و 115 و 121 ی دەستوور كە بە كۆی گشتی، دەسەڵاتی نەوت و گاز نادات بە حكوومەتی فیدراڵی، بەڵكو ئەم مادانە ڕێ بە هەرێمەكان دەدەن كۆنترۆڵی چۆنیەتیی بەرهەمهێنانی نەوت و گاز لە ناوچەكانی خۆیان بكەن.

دادوەر شوێبڵ شیكارییەكی وردی بۆ بڕیارەكەی ساڵی 2022 ی دادگای باڵای فیدراڵیی عێراق كردووە كە تێیدا یاسای نەوت و گازی حكوومەتی هەرێمی كوردستانی ساڵی 2007ی بە نادەستووری لە قەڵەم دا. ئەو دادوەرە دژی ئەم بڕیارەی دادگای فیدراڵیی عێراقە و پێی وایە، حكوومەتی هەرێم مافی دەستووریی خۆیەتی یاسا و ڕێسا بۆ كەرتی نەوت و گاز دابنێت.

دادوەر شوێبڵ هاوڕای بیروبۆچوونەكانی پرۆفیسۆر جەیمس كراوفۆردە لەبارەی مافی حكوومەتی هەرێمی كوردستان، بۆ بڕیاردان لەسەر گەڕان بەدوای نەوت و دەرهێنانی كە بێگومان ئۆتۆنۆمییەكی زیاتر دەبەخشێت بە هەرێمی كوردستان.

لە كۆتادا بۆچوونە یاساییەكانی دادوەر شوێبڵ، پشتگیریی تەواوە لە مافە دەستوورییەكانی هەرێمی كوردستان كە ڕێ خۆش دەكات بۆ حوكمڕانییەكی بەهێز و سەربەخۆ لە بەڕێوبردنی سەرچاوە نەوتی و گازەكانیدا.

ستیڤن ئێم شوێبڵ یاساناسێكی ئەمەریكی و ڕاوێژكار و دادوەرێكی نێودەوڵەتییە. پلە و پۆستی گرنگ و جۆراوجۆری هەبووە، وەك دادوەری دادگای كارگێڕیی بانكی نێودەوڵەتی (2010-2017)، ئەندامی گرووپی نیشتمانیی ئەمەریكا لە دادگای ناوبژیوانیی هەمیشەیی، سەرۆكی دادگای كارگێڕیی سندووقی دراوی نێودەوڵەتی (1993-2010 )، سەرۆكی دادگای دادوەریی نێودەوڵەتی (1997-2000)، جێگری سەرۆكی دادگای دادوەریی نێودەوڵەتی (1994-1997) و دادوەری دادگای دادوەریی نێودەوڵەتی (1981-2000).

پێش ئەوەی لە دادگای نێودەوڵەتیدا دەستبەكار بێت، شوێبڵ وەك جێگری ڕاوێژكاری یاسایی وەزارەتی دەرەوەی ئەمەریكا (1974-1981) كاری كردووە. هەروەها وەك یاریدەدەری ڕاوێژكاری یاسایی وەزارەتی دەرەوەی ئەمەریكا (1961-1967) كاری كردووە. دادوەر شوێبڵ پرۆفیسۆری یاسا بووە لە سكوڵی یاسای هارڤارد (1959-1961) و زانكۆی جۆنز هۆپكینز (1967-1981).