وتەبێژی فەرمی سكرتێری گشتی نەتەوە یەكگرتووەكان رایگەیاند: كەرتی غەززە لە ماوەی شەش ڕۆژی ڕابردوودا "دڵۆپێك ئاو"ی پێنەگەیشتووە

دوجاریك لەمیانی كۆنگرەیەكی ڕۆژنامەوانیدا گوتی: لەگەڵ هاوكارەكەم لە (دەزگای فریاگوزاری و كارەكانی فەلەستین) بە تەلەفۆن قسەم كرد و گوتی: كە شەش ڕۆژە نەیانتوانیوە دڵۆپێك ئاویان دەست بكەوێت. 
هەروەها ئاماژەی بەوەشكرد، لە ئێستادا ئەمینداری گشتی نەتەوە یەكگرتووەكان سەرنجی لەسەر دەستەبەركردنی مۆڵەت لە دەسەڵاتدارانی ئیسرائیلە بۆ چوونە ژوورەوەی یارمەتییە مرۆییەكان بۆ كەرتی غەززە.
وتەبێژی ڕێكخراوە نێودەوڵەتییەكە دەشڵێت: ئێمە هەموو هەوڵێك دەدەین كە لە تواناماندا بێت، لەگەڵ ئیسرائیلیش كاردەكەین، بێگومان لەگەڵ میسرییەكانیشدا، بۆ ئەوەی هەوڵبدەین هاوكاری پێشكەش بكەین.
لەلایەكی دیكەوە جۆزێپ بۆرێل، وەزیری دەرەوەی یەكێتیی ئەورووپا ڕایگەیاند، بانگەوازی ئیسرائیل بۆ چۆڵكردنی زیاتر لە ملیۆنێك فەلەستینی لە باكووری كەرتی غەززە لە ماوەی یەك ڕۆژدا "جێبەجێكردنی بە تەواوی مەحاڵە".