وەزیری دەرەوەی ئەمریکا گەیشتە ئیسرائیل

ئەمڕۆ پێنجشەممە ئەنتۆنی بلینکن، وەزیری دەرەوەی ئەمریکا دوای هێرشە لەناکاوەکەی بزوتنەوەی حەماس، بەمەبەستی نیشاندانی هاودەنگی وڵاتەکەی گەیشتە ئیسرائیل.
لە وەڵامی ئەو هەڵمەتانەی کە لە دو کەمپی پەنابەران لە غەززە ئەنجامدرابون و هاوڵاتیانی مەدەنیی کردە ئامانج، بزوتنەوەد حه‌ماس هەڵدانی موشەکی بۆ تەلئەبیب ڕاگەیاند.

پەرەسەندنی سەربازی لە نێوان ئیسرائیل و بزوتنەوەی حەماس بەردەوامە، بەوپێیەی ژمارەی کوژراوانی بۆردومانی ئیسرائیل بۆ سەر غەززە بۆ هەزار و 200 کەس بەرزبوەتەوە و پێنج هەزار و 600 کەسیش بەهۆی بۆردومانەکەوە برینداربون، ئه‌وه‌ش بەپێی ئامارەکانی وەزارەتی تەندروستی فەڵەستین، هاوکات ژمارەی کوژراوانی لایه‌نی ئیسرائیل گەیشتوەتە هه‌زار و 300 كوژراو.

نەتەوە یەکگرتوەکان ئەمڕۆ پێنجشەممە رایگەیاند، زیاتر لە 338 هەزار کەس ناچاربون ماڵ و حاڵی خۆیان لە کەرتی غەززە بەجێبهێڵن، کە لە دوای بۆردومانی توندوتیژی ئیسرائیلی ناوچه‌كانیان بۆردومان کراوە لەو کاتەوەی حەماس لە ڕۆژی شەممەی رابردوه‌وه‌ هێرشێکی کتوپڕ و خوێناوی بۆ سەر باشوری ئیسرائیل دەستپێکردوە.

بزوتنەوەی حەماس شەوی رابردو رایگەیاند، ژنێکی ئیسرائیلی و دو منداڵەکەی ئازادکردوە، کە شەممەی رابردو چەکدارەکانی لە کاتی هێرشە لەناکاوەکەیان بۆ سەر دەوڵەتی ئیسرائیل رفاندبویان، به‌ڵام ئیسرائیل بە فێڵێکی میدیایی زانیوە و جەختی لەوە کردەوە کە "ئەو ژنە و دو منداڵەكه‌ی لەنێو ئەو بارمتانەی لە کەرتی غەززەدا نەبون".

بەپێی ئاژانسی فرانس پرێس، ئەنتۆنی بلینکن، وەزیری دەرەوەی ئەمریکا به‌یانی ئه‌مڕۆ پێنجشەممە بە مەبەستی نیشاندانی هاودەنگیی وڵاتەکەی دوای هێرشێکی لەناکاوی بزوتنەوەی حەماس لە ئیسرائیل گەیشتە تەلئەبیب، بڕیارە بلینکن سەردانی بنیامین نه‌ته‌نیاهۆ، سەرۆک وەزیرانی ئیسرائیل بکات، هاوکات واشنتن پشتڕاستی کردەوە کە لە پاڵ هاوپەیمانەکەیدایە کە دەوڵەتی ئیسرائیله‌.

هەروەها بلینکن سبه‌ی هەینی لە عەممان وتوێژ لەگەڵ مەحمود عەباس، سەرۆکی فەڵەستین و شا عەبدوڵای دوەم شای ئوردن ئەنجام دەدات، ئه‌وه‌ش به‌پێی بەوتەی بەرپرسێکی ئەمریکی.