ھەنگاوی خوار لەسەر ڕێیەکی ڕاست !
ئەوەی نەوتەکەی لێ وەرگرتینەوە عێراق نەبوو ، ئێرانیش نەبوو ،، ئەمانە ڕاستە دەوڵەتن و لە مەحافلی نێودەوڵەتیدا گوێیان لێ ئەگیرێ ، بەڵام لە مەسائیلی وزەدا ، گوێ لەمستن و گوێیان ئەگیرێ ، قەرار لای خەڵکی تر و لە شوێنی ترە !
ئەوەی نەوتەکەی لێوەرگرتینەوە ئەمریکا و غەرب بوو ،، ئەمان ئەیانەوێ لەم قۆناغەدا کە ( چین ) فیل ئاسا بەربۆتە گیانی ناوچەکە و ھەرچی دێتەسەر ڕێی ، یان بە لووت ھەڵیئەمژێ یان بە پێ پانی ئەکاتەوە ، لە عێراق ،، خاکە بەپیتەکەی شەڕوشۆڕ ، ئەو فیلەتەنە ڕابگرن و ئەگەر پێیشیان ڕانەگیرا ، ئەوا ھەرھیچ نەبێ ڕێ نەدەن سەلامەت تێپەڕێ ! ھەربۆیەش وەکچۆن عێراقێکی بەھێزیان مەبەستە کە لەئێستادا ھەبێ ، ھەرێمێکی بەھێزی کوردستانیشیان بۆھەمیشە ئەوێ ،، ئەیشیانەوێ ھەرێمەکە بەڕادەیەک بەھێز بێ ، ئەگەرھاتوو عێراقی بن ھەنگڵی ئێران لەخەت لایدا و چووە سەر دینی چین و ماچین ( کە زۆر بۆی ھەیە بچێ )، ئەوا ئەم ھەرێمە ھاودید و ھاوسەنگەر و ھاوھەمووشتێکەی خۆیانیان لەدەست نەچێ و بمێنێ ،، بمێنێ تا بکارێ ھەم ئەو ڕێیەی خۆی ئەیەوێ بیگرێتەبەر ، ھەم سەرەڕێ لەوانی تریش بگرێ !
مێژووی ئێمە و غەرب ، ھەقایەتێکە و ڕووداوەکانی لەیەک ئەچن ، بەڵام ھەرجارەی نیھایەتییەکیان ھەیە و نیھایەتەکانیشی ڕاستە تاڵاوی وەک نسکۆی ئەیلوول و لەقاڵبدانەوەکەی دوای ڕیفراندۆمی تێدایە ، بەڵام دامەزراندنی ھەرێمی کوردستان و چەسپاندنی فیدراڵییەت و نەوت و بۆری نەوت و ناومان لەسەر نەخشەی جیھانی بۆ وزە ، لەو نیھایەتە شیرینانەن کە قیمەتیان قەت تەواو نابێ و ئیتر لەوەبگەڕێن ئێستا چیە و چۆنە ، بۆ سبەینێ بڕوانن کە چۆن ئەبێ و چی لێ دێ !
ئێمە لەسەر ڕێیەکی ڕاستین بەڵام بە مەجموعەیەک ھەنگاوی خوارەوە ،، خوارییەکان زۆرن ، بەڵام ئەم ملشکاندن و دەست بادان و ھەرکەس بۆخۆیەی دەستمان داوەتێ ، خوارترینەکانن ! جا بۆئەوەی پاشنەکەوین ، یان پاشنەخرێین ، ڕاستکردنەوەیان نەک زەروورە ،،
زۆریش زەروورە .
شێروان تالیب.
وەڵام بدەوه