ئەگەر سیاسەت هونەری مومکینات بێت، بواری سیاسیش سەرباری ئاڵۆز بوونی، پانتایەکی بەرفراوان و فرە رەهەندە بۆ جووڵە و دەرکەوتن و بە جێ هێشتنی چوار دیواری نووسینگەکان.
مێدیا بوارێکی گرینگ و دەلاقەیەکی بەرفراوانە بۆ گەیاندنی پەیامی سیاسی، روئیای سیاسی و روشنایی خستنە سەر بەرنامەی سیاسی.
سود وەرگرتن لە مێدیا لەم سەردەمەی گەشەی خێراو سەرسووڕهێنەری تەکنۆلۆجیا و گەشەی پیشەسازی و وەچەرخانە گەورەکانی تۆرە کۆمەڵایەتیەکان هەموو کونج و کەلەبەرێکی کۆمەڵگا جیهانیەکانی تەنیوەتەوە، ئەرک و بەرپرسیارەتیەکان قورستر دەکات.
ئامادە بوونی سەرۆکی حوکومەت لە دیدارێکی مێدیایی و وەڵامدانەوەی دەیان پرسیاری هەڵقوڵاو لە ناخی کۆمەڵگاو رون کردنەوەی روئیای حوکومرانی بۆ دۆزینەوەی چارەسەری ئاڵنگاریەکان، جێگەی دەستخۆشی و گێڕانەوەی هیوایە بۆ ئاییندەی حوکومڕانی لە هەرێمی کوردستاندا.
دوایی تێپەڕاندنی چەندین دۆخ و قۆناغی پڕ لە هەورازو نشێوو تەژی گۆڕانکاری لە رووبەری دونیای سیاسەتی هەرێم و گفتوگۆکانی نێوان هەرێم و بەغدا و دروست بوونی دەیان گریمانەو پرسیار، ئامادەبوونی سەرۆکی حوکومەت لە دیداری مێدیایی، گێڕانەوەی ئومێدو شڵەقاندنی گۆمی بێدەنگی و خستنە جوڵەی کۆمەڵگایە بەرەو دۆخێکی باشترو گونجاوترو زیندووترەوە.
وەڵام بدەوه