ڕێکەفتن دگەڵ لایەنێ شیعە چوجاران ھەیا داویێ نابن، چونکو بخوە نینن، ئێراقا سەردەمێ شیعەگەریێ دا، ئەو وڵاتەیە کو بەرپرسێن وێ نە چوجاران بخوە بوینە و نەخوەدیێ بڕیارا خوە بوینە، بەلکو ھەردەم ئەوێ بڕیارێ دەت لایەنێ دەرەکی بویە، کو ھەژمون و نفوسا وان زۆرە ل ئیراقێ. بەرپرسێن ئیراقێ ب تنێ بئەرکێ جێبەجێکرنێ رادبن بۆ وان بڕیارێن ل سەر وان دا بۆ دھێن، ژ ئالیێ وڵاتێن ھەرێمی و ئیقلیمی.
پۆستێ سەرۆک کۆماری کو نھا جادا کوردی گەرم کریە، کریە دوو بەرە، پارتی دڵنیایە ب سەرکەفتنا کاندیدێ خوە، بحوکمێ ھندێ پارتا ئێکی یە لھەرێما کوردستانێ، لسەر ئاستێ ئیراقێ ژی پارتا ئێکێ بوو، رێکەفتن ژی ھەیە دگەڵ ھەردوو کوتلێن مەزن یێن شیعە و سونە. ئێکەتی ژی سەرکەفتنا کاندیدێ خوە دڵنیایە. لێ ڕاستیەک ھەیە ئەڤ جارە ئێکەتی ب تمامی ل دەرڤەی ھاوکێشا سیاسی یا ئیراقێ یە، ئێکەتی ل دەرڤەی ھاوکێشا سیاسەتا ئیراقێ ب رامانا ھندێ نادەت کو کاندیدێ وێ نابیتە سەرۆک کۆمار، بەڵکو وێ رامانێ ئێکەتیێ چو کاریگەری نینە ل سە بون و نەبونا کاندیدێ خوە بۆ سەرۆک کۆماری، ئەوێ کاریگەریا خوە ھەی لایەنێ دەرەکی یە، کو تنێ ئێکەتی کارەکتەرە ل دەستێ وان دا.
ئیرانێ، بتمامی ھەژمون و نفوساخوە ل ئیراقێ دا سەپاندیە، کو ئیھمالکرنا ئیرانێ لھەر حکومەتا ئیراقێ دا نێزیکە لمەحال بونێ، کو دروشمێ سەدر نەحکومەتا شەرقی یە نەیا غەربی یە،
سەدر خوەژی باش دزانیت بێ ئیران سەرکەفتی نابیت، دکاریت دەستێن وێ کورت بکەت، دەسھەلاتێن وێ سنۆردار بکەت، لێ دەرئێخستنا ئیرانێ نھادا مینا بەنزینێ ب ئاگری دا بکەی، کو بەرییا ھەمیان سەدر خوە دێ تێدا سوژیت، ب حوکمێ ھەبونا ھێزەکا زۆرا حەشدا شەعبی کو سەر ب ئیرانێ ڤەیە، ئەڤە ژبلی چەندین گرۆپێن دن کو دھناڤا حەشداشەعبی دا دروست بووین، ب ئاشکرا ھەراشا ژناڤبرنێ ل ھەرکەسەکێ دکەن کو مەترسی بن بۆ سەر بەرژەوەندیێن ئیرانێ.
ل ھەمبەردا ئیران ژی نکاریت مینا ھەر جاران بۆ بچیتە سەری ئەوا بڤێت لماوێ بوریدا لسەر سەدری ژی بسەپینیت، چونکو سەدر نھا بھێزترین کەسێ سیاسی ئیراقێ یە، کو زۆرترین کورسی ھەنە، ڤێرەدا پێتڤیا وان ب لێک تێگەھشتنا زۆرترە کو بەرژەوەندیێ ھەردوو ئالیان تا ڕادەیەکێ د پاراستی بن، کو سەدری ب گاڤەکێ ھاتە پێش ب تنێ ڤیتۆیا خوە لسەر مالکی دانا ل بەرەیێ ھەماھەنگی کو نێزیکن ل ئیرانێ، ئیرانێ ژی ناخازیت ب تمامی دەربکەڤیت، گەر لێک تێکگەھشتن ھەبوو ل گەڵ سەدری، شوینا مالکی دێ ھادی عامری بەشداری پێ ھێتەکرن، دەما ھادی عامری ھات ئێکەتی بخازیت یان نە دێ بەشدار بیت، بۆ تمامکرنا وی نەخشێ ئیرانێ داڕشتی، کو ھەڤسەنگیا خوە بپارێزیت ل حکومەتا نوی یا ئیراقێ دا، بتمامی دەرڤەی حکومەتێ نەبیت.
ئیرانێ، بۆ دەستەیا سەرۆکایەتیا پەرلەمانێ ئیراقێ ب تمامی ل دەرڤەی ھاوکێشێ بوو، ئەوێن ماین سەرۆک کۆمار، سەرۆک وەزیرانە، ھەیا ڕادەیەکێ زۆر نکاریت ئەوا بخازیت سەرۆک وەزیران ل نێزیکی وێ بیت، ب تنێ شەڕێ ب دەست ڤەئینانا سەرۆک کۆماری مایە، کو ئیران دێ ھەر تشتی کەت کو ئێکش سەرۆکاتیان نێزیکی وان بیت. ل وی دەمی ئیرانی یاری ب تمامی خواند دەما بنەیاسایی کورسیێن بەرە و پارتێن نێزیکی خوە زێدەکرین، کورسیێن بەرە و پارتێن دن کێم کرین، کو دوو کورسی ل پارتی کێمکرن، ل ھەمبەردا دوو کورسی بۆ ئێکەتیێ زێدەکرن، دگەل چەند کورسیێن دن بۆ بەرەیێن نێزیکی خوە زێدەکرن.
ئیران دێ ھەمی ھەوڵان دەت، ئێکەتیێ و پارتێن دن یێن کوردی بکەتە ئەڵتەرناتیڤێ پارتی دحکومەتا نوی یا سەدری دا، لھەمبەردا سەدر ئارمانجێن مەزن ھەنە، کو دەستێن ڕۆژئاڤا ببڕیت د حوکمڕانیا ئیراقێ دا، ب تایبەتی ھێزێن شەرکەرێن ئەمریکی ب تمامی ل ئاخا ئیراقێ ب ھەرێما کوردستانێ ڤەژی دەربێخیت ب رێکا یاسایێ. سەدر باش دزانیت دەسھەلاتا زۆر بڤێت پێتڤیا وی ب ھەڤلێرێ ھەیە، ھەڤلێرژی پارتی نوێنەراتیێ دکەت نە پارتێن دن، پارتی ژی تاکە پارتە ل تەڤ ئیراقێ کو تا ڕادەیەکی زۆر بێ لایەنە، خوەدیێ بڕیارا خوەیە، نەچویە نەژێر ھەژمونا ڕۆژئاڤا، نە ژێر ھەژمونا ڕۆژھەلاتێ، نە دژایەتیا وان ژی دکەت، پەیوەندی دگەل ھەردوو ئالیان دباشن.
لێ دگەل ھندێ سرۆشتێ سەدر وەھایە، ناخازیت ھەڤپەیمان و نێزیکێن وی بھێزبن، بۆ ھندێ چوو بەربەست بۆ دروست نەبن، کۆ ئارمانجاوی وی ب گرتنا دەسھەلاتێ ئەو پرۆژە و پلانێن نەخشە بۆ دارژتی دەستەبەربکەت، کو ناڤەندەکا بھێز ھەبە ل بەغدا، ھەیا ڕادەکێ زۆر ئەو دەسھەلاتدار بیت، کۆ بۆ ئارمانجێب سەدر گەر سەربگریت ئێکەتی باشترە ل پارتی یێ، ھادی عامری باشترە ل مالکی، ھەیا ڕادەکێ سەدر شیایە مالکی دەربێخیت چو ئومێد نەماینە، لێ ئەرێ دکاریت پارتی دەربێخیت ل ھاوکێشایا نوی یا حکومڕانیێ، کو ئەڤە نێزیکە ل مەحالێ.
ل ڤان چەند ڕۆژێن مایی بۆ ھەڵبژارتنا سەرۆک کۆماری ئیران دێ تەڤ کارتێن خوە بکارئینیت، بۆ ھندی سەدر بۆ پۆستێ سەرۆک کۆماری بچیتە ژێر ھەژمونا وان، کاندیدێ نێزیکی خوە بکەتە سەرۆک کۆمار نە کاندیدێ بارزانی. دشێین بێژین شەڕێ سەرۆک کۆماری ناڤبەرا پارتی و ئیرانێ یە، نە ناڤبەرا پارتی و ئێکەتیێ یە. سەرڤەییا ھاوکێشا حوکمڕانیا ئەڤ جارە یا ئیراقێ بۆ تەڤ لایەکێ خۆیایە، لێ ناڤەرۆک دا زۆز ئاڵوزە، کێم کەس ھەنە بکارن بخوینن و لێتێبگەھن، چوو تشت ھەیا داویێ مسۆگەر نینن، نەکاندیدێ پارتی مسۆگەر بوویە، نەکاندیدێ ئێکەتیێ ب تمامی دۆڕاندی یە، دەرڤەی کۆشکا سەلامە، ھەرتشت ئەگەرێ گۆڕانکاریێ ھەیە.
وەڵام بدەوه