زمان بۆ ئێمەمانان کەرەسەیەکی بەهێزبوو بۆ تێگەیشتن لە یەکتر، لە کۆمەڵگاو لە دەورووبەرمانەوە. فەزای پانتای ژیانی سەردەمی مناڵی فەزایەکە بە دەیان نهێنی و تاریکی و خاڵی نادیارو وێستگەی داپۆشراوەوە ئاخێنراوە.
تێگەیشتن لە ماهیەتی ئەم فەزایە، لە ژینگەی کۆمەڵایەتی و هەلومەرجە پەروەردەییەکانی ئەم قۆناغەی زۆر خێرا تێپەرین. هەلومەرجی قۆناغەکە پێویستی بە زمانێک بوو یارمەتیمان بدات، بتوانین وەسفی نهێنیەکانی ناوەوەی شوناسی خۆمان و کایەی ژیان و کاراکتەرەکانی نێو فەزاکە و ژینگەی ژیانی پێ بکەین.
زمان کەرەسەیەک نیە بۆ ئەوەی ناختی پێ کۆنترۆڵ و هەستەکانتی پێ لە چوارچێوە بدەی و سنووری بۆ دابنێی. زمان لە چەشنی نیعمەتێکی خوایی ئامرازێکە بۆ پەی بردن بە نهێنیەکانی ئەم دونیایە، کەرەسەیەکە بۆ ئاڵوگۆڕو پەیوەندی کردن بە دەورووبەرەوە.
زمان بەردی بناغەی بونیادنانی گفتوگۆو دانوستاندن و دروست کردنی هەلومەرجی لێکتێگەیشتن و گەرەنتی تێگەیاندن و لادانی هەورو تەمومژی لێک ناحاڵیبون و رێڕەوی راستەقینەی گەیشتنە بە حەقیقەتەوە.
زمان بە گشت تایبەتمەندیە ناوەکیەکانیەوە، چەکێک نیە بۆ هەڵگیرسانی شەڕەجنێو، سەنگەرلەیەکتری گرتن، ئاڵۆزکردنی فەزای پێکەوەبوون و پێکەوەژیان و هێزێکی مەجازی نیە بۆ دابەزاندنی بەهائینسانیەکان و بن کۆڵ کردنی بنەما ئەخلاقیەکان و لە ناوبردنی ویژدان.
زمان ئەشێ هەم وەسفی جوانیەکان و ستایشی ئاکارە جوانەکانی پێ بکرێ هەمیش جوانیەکانی پێ ناشرین بکرێ و وەک چەکێکی کوشندەو وێرانکەر، دەروونی مرۆڤەکانی پێ وێران و کۆمەڵ و جڤاکی پێ ئاڵۆز بکرێ.
کۆنترۆڵ نەکردنی ناخ و هێنانە سەرزمانی دەرهاوێشتە وێرانکەرەکانی ناخێکی ئاڵۆزو تووڕەو سەغڵەت، تاریکی بەرهەم دەهێنێ و روناکیەکان لێل دەکات و جوانیەکان دەشێوێنێ و لە حەقیقەت دوورمان دەخاتەوە.
زمان ئامرازێکە گەرەکە بە ئەمانەتەوە بەکاربهێنرێ، نەک بکرێ بە کەرەسەی خاوی کارگەکانی بەرهەم هێنەری جنێوو دەمشڕی و دەم بەهەراشی و داهێنانی سوکایەتی کردن و لەکەدارکردنی ئەخلاقی کۆمەڵایەتی و پیس کردنی ژینگە و رووبەرووکردنەوەی مرۆڤەکان و بەگژ یەکداکردنی دیوەتاریکەکەی کۆمەڵگا بە رووە روناکەکەیەوە.
وەڵام بدەوه