هەر نەتەوەیەک دەرز کەوتە نێو ڕیزەکانی ئاستەمە بگات بە ئامانجە نیشتیمانی و نەتەوەییەکانیەوە.
ئاڵۆزی و دروست کردنی بەستەڵەکی نێوان ڕیزەکانی گەل، پرۆسەی نەتەوە سازی و سەرخستنی ئارمانجە نیشتیمانیەکان پەک دەخات و ریسەکان دەکاتەوە بە خوری.
زیاد لەمەش دووبەرەکی و ناکۆکی نەتەوەیی دۆخێکی ئاڵۆزکاوی تەژی بێ متمانەیی و دڵەراوکێ دێنێتەکایەوەو وڵات پەلکێشی ناو دەیان کێشەو تەنگوچەڵەمەی هەمەجۆری تر دەکاتەوە.
لە فەزایەکی ناجوری لەمجۆرەدا روئیای چارەسەرکردنی کێشەکان و خواستی گەیشتن بە کەناری ئارامی و دڵنیابەخشین بە هاونیشتیمانیان و زیندوو هێشتنەوەی هیواو داگیرسانی چرای ئومێد بە ئاییندەیەکی گەش و روناک، لە ناو دەچن.
هەڵبەت لە دۆخێکی لەمجۆرەدا، ئەرک و بەرپرسیارەتی حزب و لایەنە سیاسیەکان لە سەرووی گشت ئەرکوبەرپرسیارەتیەک دایە.
هەوڵدان بۆ نەشڵەقاندنی شەقام و زامن کردنی هێمنی و ئارامی کۆمەڵایەتی و سایکۆلۆژی تاکەکان و رووبەرووبوونەوەی ئاڵنگاریە جۆراوجۆرەکان، تەنیاوتەنیا ناخرێتە سەر شانی یەک لانەنەوە.
بەڵکوئەشێ هەموو لایەنە سیاسیەکان، بە ئەوانەیشەوە وەک بەرخۆر وان و لە سیستەمی حوکمرانیدا نین و دوورەپەرێز وەستاون، بە ئەرک و بەرپرسیارەتی مێژووییانەوە هەڵسن و خۆیان نەخەنە پەراوێزو مەلاسدانی تێکدانی ئارامی و ئاسایشەوە.
هەرلایەنێکی سیاسی بیەوێ لە رێگەی جموجۆڵە سیاسیەکانیەوە قاچێکی لە حکومەت و قاچەکەی تری لە بەرەی بەرهەڵستکاراندا بێت و یا هەر لایەنێک بە ئاشکرا بیەوێ لە رێگەی جێ بە جێ کردنی مەرامی دەرەکی و لە گۆشەنیگای بەرتەسکی بەرژەوەندیەکانیەوە، بۆچوونەکانی بەسەر ئەوانیتردا بسەپێنێ، گەرەکە حیسابی شێرپەنجەی تێکدانی یەکریزی نیشتیمانی و نەتەوەیی بۆ بکرێت و سنوورێکی بۆ دابنرێت.
وەڵام بدەوه