‎دەسپێکی قۆناغی خودبژێوی

بواری کشتوکاڵ لەم سەردەمەدا هیچی لە پێشەسازی و سامانی نەوت و گازەوە کەمتر نیە. 

‎گرینگیدان بە کشتوکاڵ لە پێناوی گەیشتن بە خودبژێوی و کەم کردنەوەی دانەوێڵەو بەرهەمە کشتوکاڵی و ئاژەڵداریە دەرەکیەکان، فاکتەرێکە بۆ سەربەخۆیی ئابوریەوە. 

‎دەکرێ بەرهەمە کشتوکاڵیەکان سەرەڕای پڕ کردنەوەی پێداویستیەکانی کۆمەڵگا، سەرچاوەیەکی باشی داهاتیش بن بۆ هەرێمی کوردستان. 

‎لە پاڵ ئەمەشدا ئەشێ کەرتی کشتوکاڵ ببێتە هۆکارێک بۆ دۆزینەوەی زۆرترین هەلی کار بۆ خەڵکی بێکارو بێ داهات و خستنە بەرکاری ئەوانەی خواستی دۆزینەوەی هەلی کاری گونجاویان هەیە.  

‎بەوپێیەی بە پیشەسازی کردنی کەرتی کشتوکاڵ بە دیوێکی تردا تا ئاستێکی باش رێژەی داهاتە نانەوتیەکان بەرز دەکاتەوەو رێگەخۆشکەرێکی گونجاویشە بۆ گەیشتن بە ستراتیژی سەربەخۆیی ئابوری و خودبژێوی نیشتیمانیەوە. 

‎ئامادەبوونی سەرۆکی حوکومەت لە سەر زەویە کشتوکاڵیەکانی دەڤەری زرارەتی و دانیشتن و گوێ گرتنی لە جوتیاران وهاندانیان بە گرینگی دان بە چاندنی دەغڵ و دانەوێڵە، هێمایەکی گرینگ و پەیامێکی کارایە بۆ پەرەپێدانی کەرتی کشتوکاڵ و گەیشتن بە قۆناغی خودبژێویەوە.