کورتبینی سیاسی و دەسکورتی عەقڵانی بۆ ئەو هێزە سیاسیانەی بێ پچڕان کار لەسەر ڕەت کردنەوەی ئەوانیتروەو دەکەن، دەرەنجامی هزرو تێڕامانێکی نامەدەنی و ناعەقڵانیە.
لەو کۆمەڵگا نەریتیانەی باوەڕە سیاسی و ئایینی و کۆمەڵاتیەکان لە بەرەنجامی پرۆسەیەکی سیاسی کامڵ و عەقڵگەراوە دروست نەبوونە و خاوەنی مێژوویەکی خوێناوی داگیرکاری و سەرکوتکردن و سڕینەوەی نەژادی بوونە، قسەکردن لەسەر حەقیقەت هەمیشە رووبەرووی چەندین ئاستەنگمان دەکەنەوەو بیر خۆیان دەبنەوە کەوا حەقیقەت یەکەیەکی فرەچەشن و گرێدراوی ئیرادەو راڤەی یاریکەران و لایەنە سیاسیەکانی پانتای سیاسەتە.
لەم جۆرە جڤاکانە ئەشێ کۆمەڵە هێزێکی پۆپۆلیستی لە بەرەنجامی نارەزایەتی و پەرچەکردارەوە، نەک خورسک و ریشەدار، لەدایک ببن و هەوڵو تەقەلاکانیان بە ئاراستەی سڕینەوەی هێزە رەسەن و خاوەن پێشینەی خەبات و رابردوویەکی سیاسی دەوڵەمەندە بێت.
ماهیەت و شوناسی جەوهەری پێکهاتەی ئەمجۆرە هێزانە، هەڵگری کۆمەڵە سیفەتێکی زاتی و بابەتی نیە. ئەم تایپە لە هێزانە خاوەن هێزێکی بەهێزی جەماوەری و پارادایمێکی عەقڵانی نین و وەک لەشکەرێکی رووکەشگەراو هێزێکی ئەفسانەیی و خورافی، ئەشێ هەڵگری دەیان درووشمی دوورلە واقع و گەورەو دیراسەنەکراوەوە بن.
ئەم تایپە لە هێزانە تاسەر ئێسقان ئیش لەسەر دروست کردنی جیهانێکی ئووتۆپیایی و کامڵ دەکەن و بە بەرزکردنەوەی دروشمە ناواقعیەکانیان هێمای کورتبینی و خورافەی سیاسی و نادروستن.
دەکرێ لە کۆمەڵگەیەکی فرە رەنگ و فرە دەنگی جیاوازو فرە جەمسەرو بەرژەوەندیەوە، کاراکتەرو بکەرە سیاسی و جڤاکیەکان لە گۆشەنیگای جیاوە تێڕامانی جیاواز دهەمبەر کێشەو ئاڵنگاریەکانی کۆمەڵگا لای خۆیان گەڵاڵە بکەن، لێ ناتوانن ئیدیعای گڵدانەوەی حەقیقەت و رەهایی راستگۆیان بەسەر لایەن و هێزە مێژووکردو خاوەن بنکە جەماوەریە بەرفراوانەکاندا بسەپێنن.
بێتوانایی ئەم تایپە لە هێزە بچوکە پۆپۆلیستە هەلپەرەستانە لە خستنەرووی چارەسەرە واقعیەکان بۆ کێشەکان و لادانی کۆسپ و ئاستەنگەکان، لە کۆمەڵگایەکی فرە دەنگ و رەنگ و فرە ئیرادەی جیاوازو فرە بەرژەوەندی، هێمایەکە بۆ بێتواناییان بە رامبەر بە گەڵاڵە کردنی زەمینەیەکی لەباری تێگەیشتنێکی یەکانگیر و دروست و دواجار هەڵتەکاندنی یەکریزی و هەوڵدان بە ئاراستەی بە پیرۆزکردنی خود و بە نەفرەت کردنی ئەوانیترەوە.
وەڵام بدەوه