بابەتەی سەرۆ کۆمارێکی کورد و کەسێکی دیاریکراو بۆ دەوڵەتی عوزمای عێراقی فیدراڵی و فرەیی، وەک کۆ کردنەوەی گشت دەنگو رەنگ و بۆچونە جیاوازەکان و هەڵگری کۆدەنگی نیشتیمانی کورد، هەمیسان کەوتۆتەوە رۆژەوەوە.
پۆستی سەرۆک کۆماری کورد مافی کوردە نەک حزب و دەستەو باڵ و تاقم و بزوتنەوەیەکی دیاریکراوی سیاسیەوە.
دەست نیشان کردنی بەربژێرێکی کورد بەر لەوەی پرسیار لەسەر جۆری کەسەکەو کەسایەتی و باکگراوندی کارکردن و کارنامەو پێشینەی سیاسی بورووژێنێ، پرسێکی بەرچاوو گرینگ و خاوەن رەهەندی نیشتیمانیە.
ئەم بەربژێرەی بۆ ئەم پۆستەی وەک ئیستحقاقی نەتەوەیی نەتەوەی کورد لە بەغا راڤەی بۆ دەکرێ، گەرەکە خاوەن کاریزمایەکی بەهێزی کۆمەڵایەتی و کاراکتەرێکی لێزانی سیاسی و سەنگین و خاوەن هەیبەت و بەهێز بێت.
هەرچەندە پۆستی سەرۆک کۆماری عێراق دوای زیاتر لە نیوسەدە حوکمرانی شمولی و تەوژمی بزاڤە تۆتالیتاریەکانی زەبروزەنگ و ترس و تۆقاندن و ئەنفال و راگواستن، گۆڕانکاری رادیکاڵی بەسەرداهاتووەو هەموو دەسەڵاتێکی یاسایی و سەربازی و سیاسی لێ سەندراوەتەوە، بەڵام لەگەڵ ئەوەشدا زۆر زەروورە کۆدەنگیەکی نیشتیمانی لەسەر کاندیدەکە بێتە گەڵاڵە کردن و پرسەکە لە چواەچێوەی یەک ناوو یەک کەسدا کورت و بچوک نەکرێتەوە.
پێداگری یەکێتی نیشتیمانی لەسەر ئەم پۆستە بۆ بەربژێری دڵخوازی خۆیان، جێی هەڵوەستە لەسەرکردن و سەرسوڕمانە. ئەم پۆستە وەک مافێکی دەستوری و ئیستحقاقێکی نەتەوەیی تایبەتە بە هەموو کوردەوەو بە تەنیا موڵکی لایەن و هێزێکی دیاریکراوی سیاسی نیە.
واباشترە سەرکردایەتی یەکێتی لە روانگەی بەرپرسیارەتی و بەرژەوەندی ستراتیژی نەتەوەیی و چاکەی گشتی کوردستانیان و زیاتر ئاڵۆزنەکردنی دۆخەکەو رێ گرتن لە ناکۆکی و پەرتەوازەیی زیاتری نێو ریزەکانی کوردستانیان بیر لە کاندیدێکی خاوەن کاریزماو سەنگین و هەڵگری بەها نیشتیمانی و نەتەوەییەکان بکاتەوەو ئەوەندە پێداگری لەسەر تاقە ناوێک و کاراکتەرێکی دیاری کراوی تاقیکراوەوە نەکات و ئەم پرسگرێکە نەکات بە گرێ کوێرەیەکی سیاسی و بێ چارەسەرو ماندووکەری پانتای تۆمەت بەشینەوەی ململانێی مێدیاییەوە.
وەڵام بدەوه