د ئیراقا نوی یا شیعەگەری دا، ھەردەم بەرییا پێکئینانا کابینەیا نوی تەڤ بەرپرسێن ئیراقێ چ شیعە بن چ سونە بن سەرەدانا ھەڤلێرا پایتەخت دکەن بۆ وەرگرتنا ئۆکەیا بەرپرسێن ھەڤلێرێ
دەما لاواز بن یان دگوپیتکا ھێزا خوەدابن ھەر پێتڤیا وان ب ئۆکەیا ھەڤلێرێ ھەیە، چونکە ئیراقا نوی وەھا دخوازیت بێ ھەڤلێر چ کابینە دروست نابن.
لێ ئەڤ جارە شیعە بوویە دوو بەرە و دوو جەمسەرگیر، ئۆکەیا ھەڤلێرێ ژ نان و ئاڤان بۆ وانان گرنگتر و پێتڤی ترە، ھەرکەسێ ئۆکەیا ھەڤلێرێ ب دەست بیت دێ بیتە حاکمێ ئیراقێ، لەوما ئۆکەیا ھەڤلێر ب دراڤەکێ زۆر ل سەر دانایە، مەبەست ژ دراڤی دراڤێ کاغەز نینە بەڵکو مەبەست ژ دراڤی مەرجێن کوردانە بۆ ئەو کەسێ کابینەیا نوی یا ئیراقێ پێک دئینیت. کیژان بەرە و جەمسەر زێدەتر مەرجێن کوردان جێبەجێ بکەت ئۆکەیا ھەڤلێرێ دێ ب دەستڤەئینیت.
ھەردەم ئۆکەیا ھەڤلێرێ بەریا پێکئینانا کابینەیا نوی یا ئیراقێ بازارێ وێ گەرم و گر بوویە، بەرپرسێن ئیراقێ ھەر ئێک ژ ئالیێ خوەڤە مشتەریە و دراڤێ زۆر پێ ددەن بەڵێنان ددەن ب تەڤ مەرجێن کوردان ڕازی دبن، لێ ھەردەما کابینە پێکئینا و جھێن خوە گرتن بێ منەت بن پشتا خوە دکەنە ھەڤلێرێ، شیعەیێن دەسھەلاتدار ئێکەم کارتا دەستێن خوە ببەنێ دژایەتیکرنا مافێن گەلێ کوردستانێ یە، نەبتنێ ڕێکەفتنا وەک خوە جێبەجێ ناکەن بەڵکی شەڕعیەتێ ژی پێ نادەن خۆ وەھا دیار دکەن کو حاشایێ بکەن ل سەر وان مەرج و مافێن گەلێ کوردستانێ رێکەفتبن. ئەڤەژی ڤەدگەریتەڤە کو کوردان بەریا پێکئینانا ھەر کابینەیەکێ نوی یا ئیراقێ کارتێن بھێز ھەنە لێ دروستکەرێن بڕیارێ کو کارت ل دەستی دانە لەزێ ژ وان کارتان دکەن ستراتیژی نینن تەڤ کارتان بکاردئینن بێ بەرچاڤگرتنا دوو رییاتیا شیعەیان کو داویێ ھەلوێیستی خوە ب تمامی ھەڤدژ دکەن، ئەڤە ژبلی پارتێن کوردستانی بەرییا پێکئینانا کابینەیا نوی تەکەزێ دکەن ل سەر ئێکگرتنا ناڤ مالا کوردی لێ ھەردەما کابینە پێک ھات دبنە چەند بەرە ناڤ مالا کوردی تێکددەن ل گورەی بەرژەوەندیێن خوە یێن شەخسی و تەسکێن حیزبی بڕیاران ددەن.
لایەنێ ھەمبەرژی کو شیعە یێن دەسھەلاتدارن مفای ژ پەرتەوازیا ناڤ مالا کوردی وەردگرن، شورێ وان دوو سەرە ل دەسپێکێ نەرم و نیانن گوتنێن خوەش دکەن کوردان مینا ئامرازەکێ بکاردئینن بۆ گەھشتنا ئارمانجا خوە، ھەردەما گەھشتنە ئارمانجا خوە سیاسەتا و ھەڵویستێ خوە ل نەرمیێ دگۆھڕن بۆ ڕقیێ و ھەڤدژیا مافێن کوردان دکەن، کوردان ژی چ کارت ب دەست نامینن چونکە ب لوژیکی ئەو ڕۆژ ل بەرچاڤان نەبوینە کو تێدا شیعە دوو رییاتیا خوە خۆیابکەن، دەرئەنجامدا کوردان چ ئەلتارناتیڤ ل دەستان دا نامینن کۆ بکاربینن بۆ وان ھەڵویست و دوو رییاتیا شیعەیان سفر ب دەست بن ب چەند گاڤا پاشڤە دچن.
ھەردەم کێشا جەوھەری یا کوردان ئەو بویە بەرییا پێکئینانا کابینا نوی بھێزە و چەندین کارت بدەست ھەنە بکاربینیت لێ پشتی پێکئینانا کابینا حکومەتێ رۆژ ل دیڤ ڕۆژێ لاواز دبیت ھەیا دگەھیتە داوییا کابینێ ب تمامی ل دەرڤەی ھاوکێشەیا دەسھەلاتێ و دروستکرنا بریارێ ل سیاسەتا ئیراقێ دبیت. پسیارا جەوھەری، ئەرێ کوردان چ ئەڵتارناتیڤ نینن یان ھەیا نھا دوو رییاتیا شیعەیان نەنیاسیە، یان کورد د سیاسەتێ دا لاوازن نکاریت خوە ل گەل پشھاتێن نوی و دوخێ دروستکری یێ ئیراقێ بگونجینیت یان نکاریت ھەمبەری تەحەددیێن ئیراقێ ب ڕاوستیت.
ئەگەر دروستکەرێن حکومەتا نوی یا ئیراقێ ھەمان میراتگرێن عەقلەیەتا بەرییا خوە بن، من گۆمان نینە دێ ھەمان حکومەت بیت ھەمان عەقلیەت و ئایدۆلۆژیا و ڕق و کین دێ ھەمبەری کوردان ھەبیت و ب توندتر دێ ڕق و کینا خوە دەرکەن ھەمبەری مافێن کوردان، ئەرێ وی دەمی کوردان دێ چ کارت دەستان دا بیت و گاڤێن لەز ھاڤێژیت بۆ وان تەحەدی و ئاستەنگێن دروست دکەن ژ ئالیێ شیعەیێن دەسھەلات دار.
دەرفەتەکا زێرین پڕ بھا بۆ کوردان دروست بوویە، دماوێ چەند ساڵێن بوری دا کورد ب ڤی قاسی بھێز نەبوینە، دروستکەرێن بریارێ دکارن ڤێ دەرفەتێ ب لوژیکی و ستراتیژیانە بکاربینن کو چاوان بەرییا پێکئینانا کابینا نوی ل سەر رێکەفت بوون ب تێوری پشتی پێکئینانا کابینێ ڕێکەفتنێ وەک خوە پراکتیزە بکەن کو تەڤ مافێن گەلێ کوردستانێ تێدا زامن ببن، ئەگەر ئەڤ جارە مافێن کوردان زەوتکران و رێکەفتن وەکی خوە نەچوو دبوارێ جێبەجێ کرنێدا وی دەمی کورد تاوانبارە و نە شیعەیێن دەسھەلات دار، چونکە خۆیادبیت کوردان ئەزمون ژ سیاسەتا تەحلا دوو رییاتیا شیعەیان وەرنەگرتیە ب درێژاییا 18 ساڵێن بوری و نەشیایە سیاسەتا خوە ل گۆڕەی دوو ریاتیا شیعەیان بگۆھڕیت.
وەڵام بدەوه