لەوەتەی رژێمی داپڵۆسێنەری بەعس لە گۆڕنراوەو عێراقی عوزما لە چنگ دڕوجانەوەرە بەعسیەکان ڕزگاری بووە، دۆخی سیاسی ئەم وڵاتە لەرزۆکەش لە رەحمەتی ئاڵۆزی و پەتای ململانێی تائیفی و بکەرە سیاسیەکانی گۆڕەپانی سیاسی نەجاتی نەبووە.
مخابن ئەو فۆڕمەی سیستەمی پەرلەمانی یا باشتر بڵێم دیموکراسی تەوافوقی بە ئێستاشەوە نەیتوانیوە هیواو خواست و داواکاریەکانی گەلانی عێراق جێ بەجێ بکات و خەونەکانیان بێنێتە دی و لە رابردووی حوکمرانی بەعس دایان ببڕێ.
بینەوبەردەی پشک پشک پشکێنەو بەرکەوتەی هەڵبژاردن لە عێراقی دوای بەعس، وێنای وڵاتێکی پڕ لە ئاشوب و گرژی سیاسی و پێکدادان و دەست تێوەردانە هەرێمایەتیەکانی ئەملاو ئەولاو لەباربردنی دۆخی جێگری سیاسیمان بۆ دەکات.
لەوەتەی پرسی سەرۆک کۆمارێکی کورد لە بەغدا خراوەتە رۆژەوە و وەک مافێکی دەستوری یاسایی کە زاکیرەی سیاسیەکانی بەغدا جێگر کراوە، بەداخەوە هیچ کام کاراکتەرە سیاسیە دەست نیشان کراوەکانی کورد بەش بە حاڵی خۆیان لەم پۆستە سیادیەدا نەیانتوانیوە کاریگەری ئەوتۆیان لەسەر ئاراستەکردنی رووداوەکان و زامن کردنی خواستەکانی کوردەوە هەبێ.
هەرچەندە ئەم پۆستە زیاتر فۆرمی جۆرێک لە دیکۆرو ئایکۆنی تەشریفاتی و ماکیاجی دیموکراسی وەرگرتووە، لێ مخابن فیگەرە دەست نیشان کراوە کوردەکانی ئەم پۆستە، ئێستاشی لەگەڵدابێ نەیانتوانیوە زامنی بەرهەڤ کردنی جۆرێک لە تێگەیشتن و کۆدەنگی و تەوافقی سیاسی نێوان لایەنە عێراقیەکان بن، کەمترین داواکاریەکانی کوردی لێ شین بێت و ئاراستەی دانوستان و رووداوەکان بەرە چارەسەری بنەڕەتی پرسگرێکەکانی خاک و بودجەی هەرێم بگۆڕن.
هەربۆیەش لەبەرچارگرتنی زامنی داواکاریە دەستوریەکانی هەرێم لە دەست نیشان کردنی هەر زاتێک حاڵی حازر بۆ ئەم پۆستە، گەرەکە لە سەرووی ئەو تایبەتمەندیانەوە بێت، سیاسیەکانی هەرێم وەک پابەنبوونێکی دەستوری بەرامبەر بە هەرێم لەبەرچاوی بگرن و سازشی لەسەر نەکەن و نەیخەنە خانەی فەرامۆشیەوە.
وەڵام بدەوه