زیاتر لە جارێک قورسایی هەرێمی کوردستانی بۆ بەغدا دووپات کردۆتەوە.
لایەنە براوەکانی هەڵبژاردنی ئەمدواییە بە تێگەیشتن لە وەزن و قورسایی و پێگەی کورد لە عێراق و بە لەبەرچاوگرتنی دەرەنجامەکانی هەڵبژاردن، گەیشتوونەتە ئەم ڕاستیەی، بەغدا بە بێ کورد ناتوانێ وێنای حوکمرانیەکی تەندروست و تەواو دیموکراسیەوە بکات و ئاستەنگەکان تێپەڕێنێ.
رابردوو سەلماندوویەتی مانەوەی دەوڵەتی عێراق لە چەشنی قەوارەیەکی یەکانگیری سیاسی و خاون سیادە و پێگە لە رۆژهەڵاتی ناوەراست، بەندە بە بەشداریکردنی کارای کورد لە کۆی گشتی پرۆسەی سیاسی و ئاراستەگرتنی بەرەو دەوڵەتێکی دامەزراوەیی شوێن برواو متمانەی نێودەوڵەتیەوە.
لایەنە براوە عێراقیە شیعی و سونیەکان دوای ڕاماڵینی بەعس گەیشتوونەتە ئەو قەناعەتەی، مسۆگەر کردنی پشتگیری نێودەوڵەتی و زامن کردنی هاوکاری و کۆمەک و یارمەتی و راوێژە سەربازی و ئابوریەکانی ئەمریکاو رۆژئاوا، پەیوەستە بەوەی بەغدا تا چەند توانای مسۆگەرکردن و دابین کردنی مافی کەمەنەتەوەکان بە گشتی و کوردی بە تایبەت لەهەگبەدا هەیە.
زیاد لەمەش تا چەند توانای بە کردارکردن و جێبە جێ کردنی سیستەمی فیدراڵی لە هزرو بەرنامەی لایەنە شیعی و سونەکان بەدی دەکرێ و تا چ ئاستێکیش کاری جدی بۆ دەکەن.
مەبەست لە پروپاگندەی هەندێ فیگەرو لایەنی گوماناویی بەوەی کورد لە بەغدا ئەوەندەی بەدوای پۆست و پلەو پایەوە وەیە، نیو ئەوەندە خەمی چارەسەرکردنی کێشەکانی نیە لەگەڵ بەغدا، دەچێتە خانەی ئاڵۆزکردنی گەڕی دانوستانەکان و هەوڵدانە بۆ بە لاڕێدا بردنی رای گشتی و قۆزتنەوەی لێڵ کردنی دۆخەکە بە قازانجی بەرژەوەندیە بەرتەسکەکانی خۆیانەوە.
وەڵام بدەوه