رەنگە سیستەمی پلۆرالیزم یا فرەیی لەو کۆمەڵگایانەی پێکهاتەیەکی نایەکسان و ناهۆمۆگێنیان هەیە بتوانێ چارەسەری زۆربەی گرفتە سیاسی و دەستەبەری مافە کولتوریەکان و بەرەوپێشەوەبردنی پرۆسەی سیاسیەوە بکات.
ئەم چەمکە دوای لەدایکبوونی هزری دیموکراسی تا کو بەمرۆش دەگات لەو کۆمەڵگایانەی پێکهاتەیەکی فرە رەنگ و فرەدەنگ و جیاواز لە رووی فکرو ئایدیایان هەیە بۆتە ئامرازێک و دەلاقەیەک و گەرەنتیەک بۆ گەیشتن بە ئایدیای پێکەوەژیان و پێکەوەهەڵکردن.
زهنیەتی پشت ئەم فکرە زهنیەتێکی لیبراڵ و تەواو کراوەیە و لە پێناو دەستەبەری مافە گشتیەکان پێڕەودەکرێت و لەو کۆمەڵگایانەی دیموکراسی توانیویەتی رەگوریشەی دابکوتێ، بۆتە زامنی ئاشتی کۆمەڵایەتی و پێکەوەژیان و پێشکەوتنەوە.
سەرەرای فرەرەنگ بوونی جڤاکی ئەمریکی لەوەتەی ئەم وڵاتە لەسەردەستی کۆمەڵێک بیرمەندەوە دامەزراوە، لێ سیستەمی دوو حزبی توانیویەتی ئەم وڵاتە لە چەندین قۆناغی سەخت و پێکدادان و ئاڵۆزیەوە بگوازێتەوە بۆ قۆناغی باشتر و پێشکەوتووترەوە. بەوەی ئەمریکا نەک توانی لەسەر پێی خۆی بوەستێ بەڵکو توانی بە پێڕەوکردنی سیستەمی دوو ئاراستەو هزری فەلسەفی و ئایدیۆلۆژیای سیاسی و فدراڵیەوە ( ویلایەت)، ببێ بە گەورەترین هێزی سەربازی و ئابوری و سیاسی لە ئاستی دونیادا.
پەیوەست بە هەرێمی کوردستانەوە ئەو زۆری و بۆریەی لە گۆڕەپانی سیاسی و حزب سازیدا بەدی دەکرێ، نەک نەیتوانیوە ببێ بە زامنی پێشکەوتن و یەکریزی گەل و پردێک بۆ پەڕینەوە لە قۆناغێکەوە بۆ قۆناغێکی تر، لێ نانەوەی ئاڵۆزی و تێکدانی ریزەکانی گەل لە لێکەوتە نەرێنیە بەرچاوەکانی ئەم زۆری و بۆریەوە بووە.
مێژوو پێمان دەڵێ و واقعیش سەلماندوویەتی، زۆربوونی رەوت و بزاڤە سیاسیەکانی هەرێمی کوردستان کەوا زۆربەیان لە هەناوی پارتی دیموکراتی کوردستان لەدایک بوونە، گێژاوێکی سیاسی و دۆخێکی پڕاوپڕ لە ئاڵۆزی لێکەوتۆتە بە هیچ کڵۆجێ خزمەت بە بەرەوپێشەوە چوونی پرۆسەی سیاسی و پرسی هاوڵاتیبوون و یەکریزی و سەرخستنی دانوستانەکانی هەرێم و بەغدای نەکردووەو نایکات.
ئەم فرەییەی لە رووی دروست کردنی حزب و بزاڤی سیاسیەوە لە ئاستی جیادا هەرێم بەدی دەکرێ تەنیا یەک ئامانجی ستراتیژی لە پشتە، ئەویش خۆی لە دەوڵەمەند کردن و دابین کردنی دەسکەوتە مادیەکان دەبینێتەوە لەسەر حیسابی چەواشەکردنی ڕای گشتی و لە خشتەبردنی کۆمەڵانی خەڵکی نارازی لە دۆخی هەرێم.
دەرەنجامیش تەنیا بڵاوکردنەوەی ترسو دڵەرواکێ و نەمانی متمانەی خەڵکە بە حکومەت و حزبەکان و پەرتەوازەیی و لێکدابڕان و دۆخێکی ئاڵۆزکاوی کۆمەڵایەتی و سیاسی و دڕدۆنگی چین و توێژەکانی کۆمەڵگای لێدەکەوێتەوەو بە زیان بۆ هەموولایەک تەواو دەبێ.
وەڵام بدەوه