کورد بە درێژایی مێژووی خەبات و تێکۆشانی لە پێناوی ئازادیدا هەرگیز نەیتوانیوە خۆی لە پەتای ترازان و دووبەرەکیەوە رزگار کات و بەرەو یەکڕیزی نیشتیمانی و نەتەوەییەوە هەنگاو بنێ.
هۆکارە زاتی و بابەتیەکانی ئەم لێکترازان و دووبەرەکیە زۆرن. هەر لە پەتاو عەقڵیەتی ناوچەگەرێتیەوە بیگرە تا دەگاتە ماهیەت و شوناسی کاری سیاسی و ئامانج لە فروستکردنی حزب و تاقم و بزووتنەوەی سیاسی.
مەرجی مانەوەی گەلان و زامنی بەردەوامبوون و هێزی نەتەوەیەکی فرەئایدیا و فرە ئاراستەی سیاسی و پانتای جوگرافیایەکی بەرین بۆ نەتەوەیەکی ستەم لێکراوو ژێردەستەکراوو داگیرکراوی وەک کورد، تەنیا یەکگرتوویی و یەکبوونە.
نەک یەکگرتووی بە مانای وەک یەک بیرکردنەوە یا گرینەبەری تاکە رێبازو ئایدیا. بەڵکو ئەشێ لە نێو ریزەکانی نەتەوە ئایدیاو هزروفکرو ئایدیای جۆراوجۆر بوونی هەبێ و ئەم حاڵەتەش زۆر ئاساییە. چونکە سرووشتی سایکۆلۆژیای مرۆڤ هەڵگری تایبەتمەندی جیاوازی خوازی و فرەیی لە بۆچوون و ئاراستەی سیاسیە.
بەڵام زۆر گرینگە بۆ نەتەوەیەکی وەک کوردی خاون شوناس و روئیاو خواست و خەون و خەیاڵی بە دەوڵەت بوون و پچڕاندنی تەوقی ژێر دەستەیی و ئازادی، پاراستنی سیحری یەکگرتوویی لە دەست خستنی ئارمانجە نیشتیمانی و نەتەوەییەکان و بەرکەماڵ بوونی داواکاریە نەتەوەییە رەواکان، بەردی بناغەی گشت هەوڵ و کۆشش و جموجۆڵێکی سیاسیەوە بێ.
کورد یەکگرتوویی خۆی نەپارێزێ، دەبێتە نێچیرێکی ئاسان بۆ ڕاوکردنی لەلایەن تورک و عەرەب و فارسەوە.
وەڵام بدەوه