بۆ ئەوانەی رق و قین بڵاو دەکەنەوە

با بەس بێ بێویژدانی و سەرەڕۆیی و بڵاوکردنەوەی رق و قین و تیروتوانج تێگرتن و ناوو ناتۆرە دۆزینەوە و سوکایەتی!
لەمە زیاتر ئاوی کانیاوی عەشق و ئەڤینی نیشتیمان،لێڵ و قوراوات و پیس مەکەن.
چیتر قەتماغەی برینە تیمار نەبووەکانی رابردوو ھەڵمەدەنەوە.
کانیاوەکانی رووبەری ژین و ژیان لێڵ و شێلوو مەکەن... رەنگە دوو ئاوایی لەولاتر ماڵە ھەژارێکی داماوو قوربانی دەستی رۆژگاری بێدادی و بێ مورادی، یا ڕانەمەڕێکی سەرگەردان و مێگەلێکی تینوو،  یا پەڕەسێلکەیەکی بێ لانە بە چۆڕە ئاوێکی پاکی ئەم ئاوە سازگارە، سوکنایی تینوتی چەندین ساڵەی ساڵانی مەینەتی وشکەساڵی بدات و تۆزی نەھامەتیەکانی رۆژگارو مرۆڤە سپڵەکان لە خۆی داتەکێنێ.
خۆزگە ھەموومان ئەو دەرفەتەمان بۆ برەخسایە بۆ سەردەمی سادەیی و جوانیەکان بگەرێینەوە.
ئێمە ھەموومان دوو قسەی خێر قەرزاری ئەم خاک و نیشتیمانە بە سوتماک کراوە بریندارەین.