قه‌ته‌ر د پێشوازیا جێوازترین مۆندیال دایه، كوردستان ژی د پێشوازیا دڕه‌نده‌ترین هێرشان دایه!
هۆگر نێروه‌یی
كوردستان هه‌می ئێك لاشه و نها یا ژ ئێشه‌كێ دنالیت كو هێشتا كوردستانا ڕۆژهه‌لات ئه‌ڤه چه‌ند هه‌یڤه‌كن خوینا وێ یا ژ پرسا ژینا بێ ژین درژیێت، سلێمانیێ چه‌ند رۆژه‌كن یا د شینیێ دا و باشوور ژی یا ل به‌ر گه‌فێن هێرشا سه‌فه‌وییان! ڕۆژئاڤا ژی جاره‌كا دی ل سه‌رده‌ستێ نفشێ خوینمژێ ئۆسمانیان ڤه هاتیه برینداركرن.
د ڤێ جیهانا مه‌زن دا كو بۆ هه‌میان هندا مه‌زنه چو كه‌سه‌ك ئالیێ دیتر نابینیت، ژ بلی كوردان تێنه‌بن، هنده بچویك بوویه! جهه‌ك بۆ نینه كو هه‌ناسه‌كێ ب كوردی بهه‌لكێشیت، د ڤێ دونیایێ دا ته‌نانه‌ت مافێ ژیانا ئازاد بۆ (هه‌ڤره‌گه‌زان) ژی ڕا هاتیه به‌خشین، به‌لێ بۆ ب كوردان نه‌هاتیه به‌خشین!
مافێن مرۆڤان د ده‌ستێن پارێزڤانێن مافێن مرۆڤان و نه‌ته‌وه‌یان دا مینا لاستیكێ یه، قه‌ته‌ڕێ چاند و نه‌ریتێن خوه نه‌شكاندن، ئایینێ خوه ب سه‌ر دونیایێ ئێخست و ئالا هه‌ڤره‌گه‌زبازان قه‌ده‌غه‌كر، هه‌بوونا خوه بۆ هه‌می جیهانێ سه‌لماند. ڕۆژئاڤایێ كو خوه ب مافێ مرۆڤ دئینیته ده‌ر چو كه‌سایه‌تی و ڕۆژنامه‌یێن جیهانێ نه‌مان كو قه‌ته‌ر شه‌رمه‌زار نه‌كرین ب به‌هانه‌یا بنپێكرنا ئازادیا هه‌ڤڕه‌گه‌زبازان كو دوهی ده‌ركه‌فتبوون.
هه‌موو ڕۆژ تۆپ و ته‌یاره جه‌سته‌یێ كوردستانێ بریندار دكه‌ن كه‌س د هاوارێ ناهێت، ب شه‌رم ڤه ژی به‌حسی لێ ناكه‌ن، قه‌ته‌ر كو هندی دو گوندێن مه‌زنێن كوردستانێ نینه یا پێشوازیێ ل جیهانێ دكه‌ت و مۆندیالێ بڕێڤه دبه‌ت. مرۆڤ تێهنیێن گولێن جوانن داكو تێهناتیا خوه بشكینن بێهنا خوه دهه‌لكێشن! كوردستان ژی كا چه‌ند ته‌مه‌تی وه‌لاتێن عه‌ره‌بی یه، هند پێشوازی ل دڕه‌نده‌یا نه‌یارێن خوه دكه‌ت، و ب لاشێ خوه تێهنیبوونا دژبه‌ران دشكێنیت!
ژبه‌ر چاره‌سه‌رنه‌كرنا پرسگرێكا كوردی سه‌دان سالان ڕۆژهه‌لاتا ناڤین ئارام نه‌بوویه. وێ ده‌مێ دێ ئارام بیت هه‌كه پرسگرێكا كوردی یان چاره‌سه‌ر ببیت یان ژی ب ته‌مامی بهێته قڕكرن!
ئه‌ڤجا داگیركه‌ر هه‌تا كو ده‌لیڤا خوه ببینن ل شوونا كو پرسا كوردستانێ چاره‌سه‌ر بكه‌ن ئه‌و دێ بژاره‌یا قركرنێ وه‌رگرن. ژ بۆ كو كورد هه‌بوونا خوه بسه‌لمینن، دڤێت ببن ئێك.
چاره‌نڤیسێ هه‌موو كوردان ل كیرا دونیایێ بیت وه‌كهه‌ڤه، ژ بۆ كوردان ئێكبوون ژ ئاڤێ و نانی گرنگتره، ل ڕۆژهه‌لاتێ، ل ڕۆژئاڤا و باكۆر (باشوور) هه‌رێما كوردستانێ په‌ناگه‌هه و باكۆر ژی ده‌ما كو باشوور هه‌بیت، یا ب هێزه. ده‌ستوورێ بنگه‌هین نوونه‌راتیا پێنجی ملیۆن كوردان دكه‌ت، هینگی پارچه‌یێن دیتر یێن كوردستانێ دێ ب ساناهیتر و زووتر گه‌هنه مافێن خوه. ژ بۆنا كوردستانه‌كه ئازاد پێدڤیا كوردان ب باشوور (هه‌رێما كوردستانێ) هه‌یه، هه‌رێما كوردستانێ ژ بۆ كو بژیت پێدڤیا خوه ب ڕۆژهه‌لات، ڕۆژئاڤا و باكۆر هه‌یه.
وەڵام بدەوه