بەردەوامبوونی هێرشە درۆنیەکان

بەردەوامبوونی هێرشە درۆنیەکان
سەرباری هەموو بەیاننامەو راگەیاندن و ئاگادارکردنەوە پێشوەختەکان و دیاری کردنی هەڵوێستی فەرمی هەرێم و دامودەزگاکانیەوە، ماوەیەکی زۆرە بەدەر لەهەر ئیعتیباراتێک، هەرێمی کوردستان کەوتۆتە بەر هێرشی درۆنی و موشەکی و پەلاماردانەوە. 
هەڵوێستی دوژمنکارانەی هێزە پەلاماردەرو لەیاسا دەرچووەکان و ئەم هێرشە نوێیەی موشەکیەی کۆماری ئیسلامی ئێران بۆ سەر بنکەو بارەگاکانی پێشمەرگە، مەترسیەکی جددیە بۆ سەر ئاسایشی هەرێم و هەوڵێکە بۆ پەلکێش کردن و ڕاکێشانی هەرێمی کوردستان بۆ ناو جەنگێکی وێرانکەری ناوچەیی و گەورەتر کردنی پانتای تێکهەڵچوون و ڕووبەڕووبوونەوە سەربازی و خوێناویەکان. 
هەموو دان بەخۆداگرتنێک سنوورێکی هەیە و بە پێی بەرژەوەندیەکان و دۆخی ستراتیژی ناوچەکە و بە لەبەرچاوگرتنی بەرژەوەندیە باڵاکانی هەرێم، پێویستە سنوورێک بۆ ئەم
دەست درێژیە دوژمنکارانە دابنرێن. 
لەوەتەی هێرشە درۆنیەکانی سەر هەرێم لە دیاردەوە دەرچوونەو بوونە بە دیاردەو هەڕەشەیەکی جدی لەسەر ئاسایشی هەرێم، هیچ هەنگاوێکی کارامان لە لایەن حکومەتی فیدڕاڵەوە نەبینی بۆ وەستاندنی ئەم هێرشانە. ئەوەی تاکو ئێستا کراوە، هیچی لە چوارچێوەی چەند بەیاننامەو لێدوانێکی رۆژنامەنووسیەوە دەرنەچووەو هەڕەشەو پەماردانەکان هەر ماون.