دروست کردنی گێژاولە پێناو مانەوەدا

دروست کردنی گێژاولە پێناو مانەوەدا
گەر سیاسەت هونەرو شارەزایی و لێزانی  ئیدارەدان و بەڕێوەبردنی وڵات و کارامەیی ئیدارەکردنی قەیران و چارەسەرکردنی تەنگوچەڵەمەکانی کۆمەڵگا بێت،  لاتبازی لە ژێر دەمامکی سیاسەت، گاڵتە کردنە بە هاوڵاتی و نیشتیمان و دروست کردنی کێشەو قەیران و ئاڵۆزکردنی دۆخی  کۆمەڵگاو ژیان و گوزەرانی تاکەکانەوە. 
گەر سیاسەت هونەری لێدوان و ئاخاوتن و دیپلۆماسی و فۆڕمی حوکومڕانی و هێور کردنەوەی دۆخە ئاڵۆزکاوو گێژەنگی دۆخە هەستەوەرەکان بێت، لاتبازی و قیژەقیژەو زیقاندن و  کێشانی مایک  بە ئەرزدا، دەرخەری هەژار کەوتن و لە جوانی کەوتن و ئاست نزمی و  دەروونێکی شەڕەنگێزو دژە ئاشتی و پێکەوە هەڵکردنە. 
بافڵ و شاسوار وەک دووانەیەکی پێکەوە لکێندراو تۆزواڵێک خەمی یەکپارچەیی هەرێم و چالاک کردنەوەی پەرلەمان و پێکهێنانی حکومەتیان نیە. ئەمان لە بری وەلانانی قسەی بازاڕی و لاتبازی سیاسی و بە بازاڕکردنی دەستەواژەی دوور لە عورف و رێساکۆمەڵایەتیەکان،   دەیانهەوێ نان بە نرخی رۆژەوە بخۆن و هەر رۆژەو  سەماکەری سەر پەتێک بن و جگە لە دروست کردنی گێژاوو گرژ کردنی بارودۆخی هەرێم،   هیچ شتێکی تریان بە لاوە گرینگ نەبێت.