کێچەکەی بافڵ و کورتانەکەی شاسوار

کێچەکەی بافڵ و کورتانەکەی شاسوار
جێگەی داخە دوو لەو بە ناو سیاسیانەی قسەی سەری زمان و بنی زمانیان چاکسازی و خزمەت و هاوسەنگی و شەراکەت و هاوکاری و هەماهەنگیە، بۆنەو کۆبوونەوە نەماوە تیایدا هێرش نەکەنە سەر پارتی و بە وشەو دەستەواژەی بازاڕی و ئاست نزمەوە کۆمەڵگاو دۆخی دەروونی هاونیشتیمانیان ژەهراوی نەکەن .
هەردوو سەرۆکی دوو حزبی بە ناو نیشتیمانی سوشیال دیموکرات و بزووتنەوەیەکی بە ناو جەماوەری لە هەوڵەکانیان بە ئاراستەی ناشرین کردنی کایەی سیاسی و بەتاڵ کردنەوەی زانستی سیاسی لە مانا، بەردەوامن. 
ئەو زمانەی ئەم دوو سەرکردەیە قسەی پێدەکەن و وەک ژەهر دەرخواردی کۆمەڵگای دەدەن، دەرخەرو سەلمێنەری پەروەردەو دۆخی سایکۆلۆژیای رووخاوی هەردووکیانە. 
کۆمەڵگای کوردی کۆمەڵگایەکی هەستیارو ماندووە. ماندووە لە پۆپۆلیزم و کاراکتەرە بە ناو سیاسیە کاڵفامەکانی بەرهەم هێنەری ڕق و قین. ماندوو لە سەرۆکی بە ناو سۆشیال دیموکراتی هەلپەرەست و هەژار لە رووی فکرو زانستی سیاسی و زمانی دیپلۆماسی و ئەدەب و لۆژیکەوە . 
نە یەکێتی و نە نەوەی نوێ بە گرتنە بەری ئەم نەهج و شێوازە ناشرینەی سیاسەت کردنە هیچ دەسکەوتێکیان دەست ناکەوێت. بگرە زیاتر هێڵەکانی ناکۆکی و پێکنەهاتن و ململانێ تۆختر دەکەنەوەو ناتوانن بە هیچ شێوەیەک سازش بە پارتی و دیموکراسی و شەرعیەتی هەڵبژاردن بکەن. 
گەرانەوە بۆ عەقڵانیەت و هۆشی کۆمەڵایەتی و واز هێنان لە زمانی زبرو بێ ئەدەبی و گرتنەبەری گفتوگۆو دانوستان و وەلانانی عینادی سیاسی، تەنیا چارەسەرێکی عەقڵانیە، پێویستە ئەم دوو حزب و بزاڤە بۆی بگەڕێنەوەو چیتر کۆمەڵگاو دونیای سیاسەت بۆگەن و ژەهراوی نەکەن.