مەسرور بارزانی و پرسی ناهاوسەنگییە گەورەكە
ئەمڕۆ لە دیداری (پرسی كورد لە رۆژهەڵاتی ناوەڕاستدا) مەسرور بارزانی سەرۆكی حكوومەتی هەرێمی كوردستان، لەنێو وتارەكەیدا پرس و باسی زۆر گرنگی وروژاند، بەڵام بە ڕای من گرنگترینیان ئەوە بوو كە باسی ئەو ناهاوسەنگییە گەورەیەی ئەم ناوچەیەی كرد كە لانی كەم لە ماوەی سەد ساڵی رابردوودا زۆر بە زەقی دیارە و بووەتە هۆكاری سەرەكیی نائارامیی وڵاتانی ئەم ناوچەیە.
هەرچەند سەرۆك وەزیران بە حوكمی پۆستەكەی و بەگوێرەی كات و دەرفەت و شوێن و ناونیشانی دیدارەكە، لەسەر بەشێك لەو ناهاوسەنگییە گەورەیە وەستا و زیاتر باسی كوردستانی باشوور و دۆخی كوردی لە عێراق كرد، بەڵام لە پەراوێزی ئەو قسانەیدا، من دەتوانم شتێ زیاتر بڵێم و بنووسم: كورت و پوخت ناهاوسەنگییە گەورەكە ئەمەی خوارەوەیە:
ئەم ناوچەیەی ئێمە تیای دەژین، لە چوار نەتەوەی سەرەكی پێكهاتووە، ئێستا لەنێو ئەو چوار نەتەوە سەرەكییەدا (كورد، تورك، فارس، عەرەب) تەنیا كورد دەوڵەتی سەربەخۆی خۆیی نیە، دەنا فارس و تورك و عەرەب، جیا لەوەی خۆیان دەوڵەتیان هەیە، لە قووڵایی ستراتیژیی ئیتنی و نەتەوەیی و مەزهەبیاندا، دەیان دەوڵەتی دیكەی هاوزمان و هاوئاراستە و هاومەزهەب و هاوسیاسەتیان هەیە، ئەمەش ناهاوسەنگییە گەورەكەیە كە بووەتە هۆی نائارامییە گەورەكەی ئەم ناوچەیە.
ئەم واقیعە تاڵە لە كاتێكدایە كە كورد نەتەوەیەكی رەسەنی هەزاران ساڵەی ئەم ناوچەیەیە، واتە لە هەزاران ساڵی رابردوودا، كورد لەم ناوچەیە چەندان شارستانیەت و ئیمپراتۆرییەت و دەوڵەت و ئەمارات و دەسەڵاتداریی ناوچەیی هەبوو، بەڵام ئێستا لەو مێژووەدا دەستبەتاڵ ماوەتەوە، ئێستا كورد نیشتمانی هەیە بەڵام دەوڵەتی نیە!
كورد زمانێكی دەوڵەمەندی فرەشێوەزاری جوگرافیا فراوانی هەیە، بەڵام دەوڵەتی نیە، كورد كولتوورێكی دەوڵەمەندی هەیە بەڵام دەوڵەتی نیە، كورد نەتەوەی هەیە بەڵام دەوڵەتی نیە، كورد سامانی سروشتیی ژێرزەمین و سەرزەمینی هەیە بەڵام دەوڵەتی نیە، كورد ئاڵای هەیە بەڵام دەوڵەتی نیە!
بەپێچەوانەی كوردیشەوە، سێ نەتەوەكەی تر، بەتایبەتی لەسەر خاكی كوردستانی مەزن، بەدرێژایی مێژووی هەزاران ساڵە، لەڕێی دەستدرێژی و داگیركاری و فتووحات و مەیلی پاوانخوازیی هەمیشەییانەوە، ئێستا لەسەر خاكی كورد، نیشتمانیان نیە، بەڵام دەوڵەتیان هەیە! ئەوە بۆیە دەسەڵاتدارانی ئەو سێ نەتەوەیە، بەدرێژایی مێژووی كۆن و نوێ، هەوڵی سڕینەوەی كورد دەدەن، لە هەموو بوونێكی كورد دەترسن، لە ناوی كوردی دەترسن، لە زمانی كوردی دەترسن، لە وشەی كوردستان دەترسن، تەنانەت لە ناوهێنانی ئایینە كۆنەكانی كوردستانیش دەترسن، لە موزیك و گۆرانیی كوردی دەترسن، لە جلی كوردی دەترسن، لە شیعر و ئەدەب و شانۆ و فیلمی كوردییش دەترسن.
سەرنج لە مێژوو بدەن، تورك لەوسەری مەگۆلستانەوە هاتوون و ئێستا بەشێك لە خاكی كوردستانی گەورەیان بە داگیركاری بەدەستەوەیە، فارس لە پێدەشت و بیابانەكانی ئێرانی ئێستاوە هاتوون و ئێستا ئەوانیش وەك داگیركەر بەشێك لە خاكی كوردستانی مەزنیان بەدەستەوەیە، عەرەب لە ناوچە بیابانەكانی خواری خوارێی نیوچەدوورگەی عەرەبیەوە هاتوون و ئێستا دوو بەشی كوردستانی مەزنیان بە دەستەوەیە، لە ناوچەكانی ئەرمەن و ئازەریش بە هەمان شێوە تەنیا كورد دەستبەتاڵ لێی دەرچووە، بە كورتی: كورد لەم ناوچەیەی خۆی مێژووی هەیە بەڵام وەك دەوڵەت ئێستای نیە بۆیە تا كورد ئایندەیەكی نەبێت، ئەم ناوچەیە ئارامی بە خۆیەوە نابینێت.
بۆیە تا ئەو ناهاوسەنگییە گەورەیە بە درروستبوونی دەوڵەتێك بۆ كورد هاوسەنگ نەبێتەوە، تا كوردیش وەك ئەو سێ نەتەوەیە تر نەبێتە خاوەن دەوڵەت، ئەم چوار دەوڵەتە (ئێران، توركیا، سووریا و عێراق) و ئەم ناوچەیە بە گشتی، ئارامی بە خۆیانەوە نابینن، رووداوگەلی مێژووی تازە گەواهیدەری ئەم قسەیەمن، كەواتە ناهاوسەنگییە گەورەكە بووەتە هۆی نائارامییە گەورەكە، جا ئەو ناهاوسەنگییە گەورەیە نابێتە هاوسەنگی و ئەو نائارامییە گەورەیەش نابێتە ئارامی، تا كورد نەبێتە خاوەن دەوڵەت لەسەر خاكی خۆی، كەی دەسەڵاتدارانی ئەم ناوچەیە و ئەو دەوڵەتانە، لەو راستیە تێدەگەن؟ نازانم! بەڵام كورد بە پێداگرییەوە بەردەوامە لە دروستكردنی ئایندەیەك بۆ خۆی.
بەرھەم عەلی
وەڵام بدەوه