واتای ژیان
لە ژیاندا خاڵێك ھەیە ھەرکاتێک پێی گەیشتی، ئەو بڕواو قەناعەتەت لە لا دروست دەکات.
تۆ ھەرچەند ھەوڵ بدەی و تێبکۆشی، ناتوانی رەزامەندی ھەمووان بەدەست بێنی. ناتوانی دونیاو دیدگای خەڵکانی تر بگۆڕی.
پرسیارە جەوھەریەکە ئەمەیە:
ئایا ئەمە کێشەی تۆیە یا کێشەی ئەوانە؟
ئایا کێشەی ئەوان کێشەی تۆیە؟
ئایا تەسکبینی و دیدگای ئەوان بەرامبەر بە ژیان و کۆی کائینات و بوونەوەرەکانی ناویەوە، فاکتە؟ حەقیقەتی رەهایە؟
ئەسڵەن حەقیقەتی رەها لای کێیە؟ ئەسڵەن پێم ناڵێی کام شێوازەی ژیان کردن ڕاست و دروست و بێ کێشەیە؟
تۆ پێم ناڵێ ی ژیان چییە؟!
مانای ژیان بۆ مشەختێک ( ئاوارە) سەرپەنایە ، مانای ژیان بۆ تینویەک قومێك ئاوە ، واتای ژیان بۆ برسیەك لەتێك نانە٬ واتای ژیان بۆ هەژارێك دەوڵەمەندیە، مانای ژیان بۆ داماوێک دڵخۆشیە، بۆ بێ بەختێک خۆشبەختیە، بۆ بێ قاچێک، رێ کردنە.
مانای ژیان بۆدەوڵەمەند و دەسەڵاتدارێك ئاسودەیی و بەردەوامیە .واتای ژیان بۆ زیندانیەك ئازادیە، مانای ژیان بۆ نەخۆشێك چارەسەرو لەش ساغي و تەندروستیە. واتای ژیان بۆ گەنجێک، زەماوەند و پێک هێنانی خێزان و ئاسودەیی دەروونیە.
مانای ژیان بۆ سیاسیەک، سیاسەت و سەرکەوتن و دەرکەوتنە، بۆ بێ بروانامەیەک، بروانامەو دەست خستنی پلەی ئەکادێمیە. واتای ژیان بۆ بێ موچەیەک، دابین کردنی ژیان و گوزەرانە.
لە کۆتادا ژیان کێشەیەک نیە چارەسەر بکرێت، ئاڵنگاریەک نیە میکانیزمی یەکلایی کەرەوەی بۆ بدۆزرێتەوە، ماتماتیک نیە ، کیمیا نیە، فیزیا نیە، مێژوو نیە، فەلسەفەی فڵانە فەیلەسوف و بۆچوونی فیسارە کەسایەتی و ئایدیۆلۆژیای حزبی و کێشەیەکی روناکبیری نیە.
ژیان قۆناغی تاقیکردنەوەی ئێستایە بۆ پەڕینەوە بۆ داهاتوویەک نە لەمن دیارە نە لە تۆ…ژیان ئێستایە، خەڵاتێکە پێویستە چێژ و خۆشی لێوەربگیرێت و لەگەڵ هەلومەرجەکانیدا خۆت بگونجێنی.
خۆر تا ھەتایە لە پشت ھەورەکان نامێنێتەوە.
ھیچ ژیانێک، پرۆسەیەک، رێگایەک و ئاراستەیەک بێ ھەورازو نشێوو ھەڵبەزو دابەز و ئاستەنگ نیە...
ھیچ ئەمڕۆیەکی ئاڵۆزو پەشۆکاو، ھیچ ئێستایەکی پڕلە نیگەرانی و دڕدۆنگی، هیچ چرکەساتێکی پڕ لە دڵەراوکێ، بێ سبەینەیەکی ئارام و ئاسودەو پڕ لە دڵنەوایی نیە، بەو مەرجەی دیدگامان بەرامبەر بە ژیان و رەگەزەکانی ناویەوە بگۆڕین.
وەڵام بدەوه