ئێستا وای لێهاتووە دەستێوەردانە بەردەوامەکانی پەکەکە لە هەرێمی کوردستان بۆ هەموو هاوڵاتیان سەلمێنراوە.
ئاشکرایە پەکەکە لە ئاژاوەگێڕی و تێکدانی دۆخی هەرێمی کوردستان و بیانوودانە دەست لەشکەرکێشیەکانی وڵاتانی ئیقلیمی زیاتر، گشت ئەرکێکی شۆڕشگێڕی لەخۆی داماڵیوە.
پەکەکە لە بزووتنەوەیەکی جەماوەری چوست و چالاکی فرە رەهەندی هەشتاکانەوە ئێستاکە بچووک بووەتەوە بۆ گرووپێکی تەسکبیری داردەستی دەزگا موخابەراتیەکانی بێگانەوە.
دوای ئەوەی لە کوردستانی باکور و تەنانەت لە ئەورووپاش لە رووی بنکەی جەماوەری و چالاکی سیاسی و سەربازیەوە لە هەڵکشانەوە تووشی داکشان و نشوست و پاشەکشەیەکی بەرچاوبووەوە، ئێستاکە کاروپیشەی بۆتە ئاژاوەنانەوەو کەڵەگایی و فشار خستنەسەر هاونیشتیمانیان و کردەی قێزەوەنی سەرانە سەندن لە خەڵکی باشوری کوردستانەوە.
زیاد لەمەش پەکەکە بۆتە هۆکاری ئاوەدان نەکردنەوەی گوندو ئاواییە لاتەریک و دوورەدەستەکان و رێگری گرتن لە گەیشتنی دەستی خزمەتگوزاری حکومەتی هەرێم بۆ ئەو ناوچانەی دوورە دەستن و کەوتوونەتە ژێر نفوزو داگیرکاری پەکەکەوە.
دوا داهێنانی ئەم تاقمە گێرەشێوێنەش نانەوەی ئاژاوەو تێکدانی دۆخی ئاسایش و لەباربردنی هەلومەرجەکانی ژیان و گوزەرانی دانیشتوانی شەنگال و رووبەرووبوونەوەی چەکداریە لەگەڵ ئەو هێزولایەنانەی دەیانەوێ حوکمی یاسا لە شەنگال بچەسپێنن.
هەرچەندە کورتبینی پەکەکە رێگرە لەوەی سەرکردەکانی ئەم گرووپە بە خۆیان و هەڵسوکەوت و سیاسەتەکانیاندا بچنەوە، لێ ئەگەر ئەمان تۆزقاڵێک هەستی نەتەوایەتی و بەرپرسیارەتیان هەبووایە، وازیان لە هەرێمی کوردستان و ئەزیەت و ئازاردانی هاوڵاتیان دەهێناو دەستیان لە تەخەی هەرێم بەردەدا و رووبەری چالاکیەکانیان بۆ باکور دەگواستەوە.
وەڵام بدەوه