قوباد و پافل سلێمانیان بە بارمتە گرتووە

 شاکر احمد

شاری سلێمانی هەر لە دێرزەمانەوە مەڵبەندی ئەدەب و هونەرو بزووتنەوە شۆڕشگێریەکان بووە. 
سلێمانی لەسەردەمی بابانیەکانەوە ناوەندی چەکەرەو گەشەی هزری شۆڕشگێڕی و داهێنانی ئەدەب و نووسین و تازەگەری و کوردپەروەری بووە. 

سلێمانی ساڵانێکی زۆر دوور بەر لە ئێستا چەقی شۆڕش و قوربانیدان و هەڵمەت و یاخیگەری بووە.

بەڵام….
مخابن هەنوکە کەوتۆتە ژێر دەستی دەسەڵاتدارنێکی بێ باک و بێ پێشینە و هەرزەکارانی شەقامەکانی پێگەیشتوانی ئەوروپا. هەرزەکارانێک هیچ لە مێژووی ئەم شارەو شکۆمەندی دانیشتوانەکەی ناگەن و سواری کەڵی شەیتان بوونەو دانابەزن . 

دەسەڵاتدارانێکی بێ باکی وا گوێ بە هیچ ئامۆژگاری و قسەیەکی خێر نادەن و سواری سەری خۆیان و دانیشتوانی شارێک بوونە، شایستەی لاواندنەوەو خۆشەویستی و خزمەتە نەک ناشرین کردنی بە خۆڵ و خاشاک و پارەدزین و بانک بڕینەوە. 

سلێمانی کەم خزمەتی مام جەلالی نەکرد تا قوباد و پافل ئێستاکە بەم دەردەی بەرن و نقومی زبڵ و خۆڵ و خاشاک و بێ موچەیی و وێرانیەوە بکەن. 

پاڤل و قوباد ئەگەر تۆزقاڵێک وەفایان بۆ باوکیان هەبوایە، ئەگەر زەڕەیەک بەرامبەر بە دانیشتوانی سلێمانی ئەمەکدار بوونایە، ئەگەر زەڕرەیەک وەفایان بۆ مێژووی شارو شکۆی خەڵکەکەی و قوربانیدانی شارەکە هەبوایە، هەرگیز نەدەبوو بەمجۆرە مامەڵە لەگەڵ سلێمانیدا بکەن. 

پاڤڵ و قوباد هەرگیز نەدەبوو ئاوا ستەم لە مردوو و زیندووی سلێمانی بکەن و باکیان بە هیچەوە نەبێت و بەو تەسکبیری و تەسکبینیەوە لە تۆڵەی حکومەت و پارتی زولم لە پارێزگایەک بکەن، لە سەختترین بارودۆخی دەیەکانی رابردووی مێژووی یەکێتیدا هەمیشە پەناگەو  ماڵەگەورەو دواسەنگەری بەرگری و مقاوەمەتی شۆڕشگێڕانەیان بووەو گەورە و بچوکی ئەوانی گرتۆتە خۆی و باوەشی بۆ کردوونەتەوە.