هەرکە بەردێک لە هەولێر لە ئاسمان بەربێتە خوارەوە یا بە هۆی کۆبوونەوەی ئاوی باران و لافاوەوە شوێنێک زیانی بەردەکەوێت یا رووداوێکی ناخۆش و نەخوازراو رووبدات یا کارەساتێکی کوشتن لە سەر کێشەیەکی کۆمەڵایەتی رووبدات، یەکسەر بێ سێودوو چی دەزگای مێدیایی دەڤەری سلێمانی هەیە وەک ئەوەی هەنگیان کە کونی دارا دۆزیبێتەوە دەیکەن بە هەڵاو قیژەقیژێک، دەنگەکەی تا کەشکەڵانی فەلەک دەروات.
سەیرەکە لەوەدایە ئەگەر هەمان رووداو یا روداوی هاوچەشن لە دەڤەری زۆنی سەوز بقەومێ، مێدیاکانی ئەوبەر زۆر سەرپێی باسی دەکەن و نە دەقیژێنن و نە دەیکەن بە هەڵاو سوک و سانا بە تەنیشتیەوە تێدەپەڕن.
ئەم ئیزدواجیەت ( دووڕوویی)ە لە شێوازی مامەڵەکردن لەگەڵ رووداوەکانی رۆژانە و گواستنەوەیان بۆ سەر شاشەی کەناڵەکانی راگەیاندن و ماڵپەڕو پەیجەکانی سۆشیال مێدیا، تا بڵێی کردەیەکی قێزەوەن و ناشرین و نابەرپرسانەیە.
ئەمە واقعێک و حەقیقەتێکی رۆشنە، مێدیاکانی پارێزگای سلێمانی بە ئەهلی و نائەهلیانەوە هەمیشە لەسەنگەر دان بە ئەنقەست رووداوەکانی هەولێرو دهۆک لە قەبارەی خۆیان گەورەتر پیشان بدەن، فوویان تێبکەن و وەک ئەرکێکی چەواشەکاری، هەولێر و دهۆک وەک دۆزەخی سەر زەوی و لای خۆشیان وەک فیردەوس و مۆدێلی هەرە بەرزی جڤاکێکی تەژی ئاشتەوایی و بەختەوەری و ئازادی و پێشکەوتن وێنا بکەن
وەڵام بدەوه