ئێران زەنگی لێیدا

وه‌زیری ده‌ره‌وه‌ی ئێران وه‌ڵامی لێدوانه‌كانی بنیامین نه‌تانیاهۆی سه‌رۆك وه‌زیرانی ئیسرائیلی دایه‌وه‌ و گوتی، بۆ ئه‌وه‌ی نه‌خرێته‌ گرتووخانه‌وه‌، ئه‌مه‌ریكا به‌ره‌و جه‌نگێكی تر په‌لكێش ده‌كات.
عێراقچی له‌ تۆڕی ئێكس نووسیویه‌تی، نه‌تانیاهۆ ئه‌مه‌ریكا به‌ره‌و جه‌نگێكی تر ده‌بات، بۆ ئه‌وه‌ی خۆی نه‌خرێته‌ گرتووخانه‌وه‌، سه‌ره‌ڕای لێكه‌وته‌ پڕ له‌ زیانه‌كان بۆ سه‌ر ئیسرائیل و سه‌رۆكی ویلایه‌تی یه‌كگرتووه‌كانی ئه‌مه‌ریكا.
له‌ به‌شێكی تری پۆسته‌كه‌ی وه‌زیری ده‌ره‌وه‌ی ئێران هۆشداری له‌ دووباره‌ هێرشكردنه‌وه‌ سه‌ر وڵاته‌كه‌ی داوه‌ و نووسیویه‌تی، نه‌تانیاهۆ ده‌ڵێ، پێویسته‌ كاره‌كه‌ ته‌واو بكه‌ین، پێویسته‌ وریا بن و ئێمه‌یش كاره‌كه‌مان ته‌واو نه‌كردووه‌.
دوێنێ بنیامین نه‌تانیاهۆی سه‌رۆك وه‌زیرانی ئیسرائیل، له‌ په‌یامێكدا دوای ئه‌وه‌ی دۆناڵد تره‌مپ پشتیوانی خۆی بۆ سه‌رۆك وه‌زیرانی ئیسرائیل ڕاگه‌یاند، نه‌تانیاهۆ وێرای سوپاسكردنی زۆری تره‌مپ، نووسیویه‌تی، پێویسته‌ ئه‌ركه‌كه‌ كۆتایی پێ بهێنین و هه‌رگیز ڕێ نه‌ده‌ین ئێران ببێته‌ خاوه‌نی چه‌كی ئه‌تۆمی.