ئەمریکا ئێرانی وێران کردووە

ئەمڕۆ شەممە، سکۆت بیسێنت، وەزیری گەنجینەی ئەمریکا ئاشکرای کرد کە واشنتن سەرکەوتوو بووە لە دابینکردنی ئاسایش و ئاسانکاری بۆ تێپەڕبوونی نزیکەی 1.1 ملیار بەرمیل نەوت بە گەرووی هورمزدا، لە بەرامبەردا توانای ئێرانی بۆ تێپەڕاندنی تەنانەت یەک بەرمیل نەوتیش بەو ڕێڕەوەدا بە تەواوی پەکخستووە
بیسێنت جەختی لەوە کردەوە کە ڕێکارە چاودێرییە توندەکانی ئەمریکا، بەدواداچوونی وردی کەشتییەکان و سەپاندنی سزاکان بوونەتە هۆی وشککردنی سەرچاوەکانی گواستنەوەی دەریایی ئێران و گوتی: "ئێمە تارانمان بە شێوەیەکی بێوێنە گۆشەگیر کردووە و لەم هەفتەیەدا هیچ کەشتییەکی نەوتهەڵگری ئێرانی لە دەریاکاندا نابینرێت."
ئەم هەنگاوە نوێیەی واشنتن لە چوارچێوەی فراوانکردنی هەڵمەتی "گوشاری توند"دا دێت بۆ سەر کەرتی وزە و نەوتی ئێران، بە تایبەتی لە ڕێگەی بەئامانجگرتن و ڕاوەدوونانی ئەو کەشتیگەلە نادیارەی کە بە "کەشتیگەلی سێبەر" ناسراوە، کە تاران پشتی پێ دەبەست بۆ دەربازبوون لە سزا نێودەوڵەتییەکان و فرۆشتنی نەوتەکەی لە بازاڕە جیهانییەکاندا.