ئێران سوپرایزی بۆ ئەمریکا دەبێت

 ئێران هەڕەشەی بەکارهێنانی چەک و تەکنیکی پێشکەوتوو دەکات. لە ماوەی 48 سەعاتی ڕابردوودا چەند کەشتییەکی بازرگانی کراونەتە ئامانج
 ئاماژەکان بۆ ئەوە دەچن کە کارتی گەرووی هورمز لە دەستی ئێران دەرچووە و تا ئێستەش نەیتوانیوە کارتی گەرووی بابولمەندەب وەک پێویست بەکار بهێنێت.
 هەفتەی ڕابردوو ئێران بۆ لابردنی گەمارۆی سەر بەندەرەکانی ویستی کارتی گەرووی هورمز بەکار بهێنێت، بەڵام ئەمەریکا ڕەتی کردەوە و ڕای گەیاند کە خۆی کۆنترۆڵی گەرووەکە دەکات.
 لە بەرانبەردا بەرپرسانی ئێران دەڵێن سوپرایزی سەربازییان بۆ ئەمەریکا هەیە و لە ئەگەری هەر مەترسییەک بۆ سەر تاران، بە چەک و تەکنیکی پێشکەوتوو وەڵام دەدەنەوە.
 بەرپرسێکی سەربازیی ئێران دووپاتی کردەوە، ئیدارەدانی گەرووی هورمز بە دەستی ئێرانە و هەر کەشتییەک لە دەرەوەی ڕێڕەوی دیاریکراو تێپەڕێت، سەلامەت نابێت.
 بەپێی سەرچاوەکان، لە ماوەی 48 سەعاتی ڕابردوودا، ژمارەیەک کەشتیی بازرگانی لە کاتی تێپەڕبوونیان بە گەرووی هورمزدا کراونەتە ئامانج و ڕووبەڕووی مەترسی بوونەتەوە.