ئیسرائیل بڕیاری کۆتایی دا

سەرۆک وەزیرانی ئیسرائیل جەخت لەسەر ڕەتکردنەوەی توندی داواکارییەکانی واشنتۆن بۆ کشانەوە لە بەرەکانی جەنگ دەکاتەوە و ڕایدەگەیەنێت، لە کۆبوونەوەی ئایندەیدا لەگەڵ سەرۆکی ئەمریکا فشار بۆ توندکردنەوەی چاودێریی بەرنامە ئەتۆمییەکەی ئێران دەکات.
ڕەتکردنەوەی پێشنیازەکانی واشنتۆن لە کابینەی ئەمنیدا
ئەمڕۆ دووشەممە ٢٧ی تەممووزی ٢٠٢٦، میدیاکانی ئیسرائیل بڵاویان کردەوە، بنیامین ناتانیاهۆ، سەرۆک وەزیرانی ئیسرائیل، ئەندامانی کابینەی ئەمنیی وڵاتەکەی ئاگادار کردووەتەوە کە بە توندی هەر داواکارییەکی ئەمریکا بۆ کشانەوەی بەرفراوانی هێزەکانیان لە کەرتی غەززە، باشووری لوبنان یان خاکی سووریا ڕەت دەکاتەوە.
بەگوێرەی ڕاپۆرتێکی ڕۆژنامەی "ئیسرائیل هایۆم"، ناتانیاهۆ لە کۆبوونەوەی کابینەی ئەمنیدا ئاشکرای کردووە کە ئەمریکا لیستێک داواکاریی پێشکەش کردوون کە کشانەوەی بەرفراوان لە هەر سێ بەرەی جەنگ لەخۆدەگرێت، بەڵام جەختی کردووەتەوە: "من بەنیازم دژی ئەوە بوەستمەوە و پێیان دەڵێم نەخێر."
ئەم هەڵوێستە توندەی ناتانیاهۆ تەنیا چەند ڕۆژێک پێش کۆبوونەوە چاوەڕوانکراوەکەی لەگەڵ دۆناڵد ترەمپ، سەرۆکی ئەمریکا دێت، کە بڕیارە تێیدا تاوتوێی پەرەسەندنە ئەمنییەکانی ناوچەکە و ئایندەی شەڕ بکەن.
مەترسییەکانی بەرنامەی ئەتۆمیی ئێران
لەلایەکی دیکەوە، ناتانیاهۆ لە چاوپێکەوتنێکدا لەگەڵ بەرنامەی (Sunday Morning Futures) لە کەناڵی "فۆکس نیوز"ی ئەمریکی ڕایگەیاند، لە میانی کۆبوونەوەکەی لەگەڵ ترەمپ، فشار دەکات بۆ بەردەوامبوونی چاودێرییەکی ورد و هەمیشەیی لەسەر بەرنامە ئەتۆمییەکەی ئێران.
سەرۆک وەزیرانی ئیسرائیل ئاماژەی بەوەش کرد، ئەو گورزە سەربازییانەی ئیسرائیل و ئەمریکا لە دامەزراوە ئەتۆمییەکانی ئێرانیان داوە، بەرنامە ئەتۆمییەکەی تارانی چەندین ساڵ دواخستووە، بەڵام هۆشداریی دا کە تاران ڕەنگە هەوڵی دووبارە بنیاتنانەوەی تواناکانی بدات، هەر بۆیە داوای مانەوەی چاودێرییە سەربازی و هەواڵگرییەکان دەکات بۆ ڕێگریکردن لەو هەوڵانە.