ئێران نەخێری بە ئەمریکا دا

ئێران پێشنیازێکی ئاگربەستی دۆناڵد ترەمپ، سەرۆکی ئەمەریکای ڕەتکردەوە کە لە ڕێگەی سەرۆک وەزیرانی عێراقەوە گەیەندراوەتە تاران. ئەم ڕەتکردنەوەیە لە کاتێکدایە کە واشنتن هەڕەشەی بەرفراوانکردنی شەڕەکە و بەئامانجگرتنی ژێرخانی هەستیاری ئێران دەکات.
بەپێی وتەی بەرپرسانی ئێرانی و عێراقی، سەردانەکەی عەلی ئەلزەیدی، سەرۆک وەزیرانی عێراق بۆ تاران، دوای کۆبوونەوەکەی لەگەڵ ترەمپ لە کۆشکی سپی هاتووه‌. بەرپرسانی ئێران ئاماژەیان بەوە کردووە، حکومەتەکەیان ئامادە نییە هیچ ڕێککەوتنێکی کاتی پەسەند بکات کە تیایدا پرسی کۆنتڕۆڵکردنی گەرووی هورمز بە هەڵپەسێردراوی یەکلایی نەکراوەیی بمێنێتەوە.
لە ڕەوتی سەردانەکەیدا، زەیدی لە تاران لەگەڵ مەسعود پزیشکیان سەرۆک کۆماری ئێران، محەمەد باقڕ قالیباف دانوستانکاری باڵا و عەباس عێراقچی وەزیری دەرەوەی ئەو وڵاتە کۆبووەوە. عێراقچی لە لێدوانێکدا بۆ تەلەفزیۆنی فەرمیی وڵاتەکەی ڕایگەیاند؛ زەیدی تێڕوانینەکانی خۆی لەبارەی سەردانەکەی بۆ واشنتن خستووەتەڕوو، بەڵام جەختی کردەوە گرفتەکە لە گەیاندنی پەیامەکاندا نییە، بەڵکو لە تێڕوانینی "نالۆژیکی و چاوبرسییانە"ی ئەمەریکادایە.
هاوکات، بەرپرسانی ئێرانی ئاماژەیان بەوە کردووە کە هێزە چەکدارەکانیان خۆیان بۆ ئەگەری بەرفراوانبوونی شەڕەکە ئامادە دەکەن ئەگەر ترەمپ هەڕەشەکانی بۆ سەر تاران و ژێرخانە هەستیارەکان جێبەجێ بکات. جەختیشیان کردووەتەوە لە حاڵەتی ڕوودانی سناریۆیەکی لەو شێوەیەدا، ئێران چوارچێوەی ڕووبەڕووبوونەوەکە لەسەر ئاستی ناوچەکە بەرفراوان دەکات، لەوانەش بەئامانجگرتنی تەلئەبیب و داواکردن لە حوسییەکان بۆ داخستنی گەرووی باب ئەلمەندەب لە دەریای سوور.