باڵیۆزخانەی ئەمەریکا لە بەغدا هۆشداری دەدات

باڵیۆزخانەی ئەمەریکا لە عێراق هۆشداری دەداتە هاووڵاتییانی وڵاتەکەی لە عێراق و داوایان لێدەکات، مۆبایلەکانیان بە شەحن کراوی بهێڵەوە و لەگەڵ خێزان و هاوڕێکانیان لە پەیوەندیدا بمێنەوە.

باڵیۆزخانەی ئەمەریکا لە بەغدا و کونسوڵخانەی گشتیی ئەمەریکا لە هەولێر لە ڕاگەیاندراوێکی هاوبەشدا هاووڵاتییانی وڵاتەکەیان ئاگادار دەکەنەوە، بەهیچ شێوەیەک سەردانی عێراق نەکەن و چەند ڕێنماییەکیشیان بۆ ئەو هاووڵاتییە ئەمەریکیانە بڵاو کردووەتەوە، کە لە عێراقن.
لە ڕێنماییەکاندا هاتووە، لە شوێنە قەرەباڵغەکان خۆیان بەدوور بگرن، هاوکات مۆبایلەکانیان بەردەوام پڕشەحن بێت و بەشێوەیەکی بەردەوام لەگەڵ خێزان و هاوڕێکانیان لە پەیوەندیدا بن، بۆ ئەوەی زانیاریی لە بارەی بارودخیان بدەن. 
هەروەها داوای لە هاووڵاتییانی ئەمەریکی لە عێراق کردووە، بەردەوام ئاگایان لە هەواڵەکان بێت، ئەوانەشی دەیانەوێت لەسنووری تورکیا و کوەیت، عێراق جێبێڵن، دەبێت باڵیۆزخانەکانی ئەمەریکا لە تورکیا و کوەیت ئاگادار بکەنەوە.