لە دوای ماوەیەك لە هەڕەشە، شەوی رابردوو هیندستان زنجیرە هێرشێكی مووشەكی و ئاسمانی كردە سەر بەری پاكستانی هەرێمی كشمیر، ئەمڕۆ ئەنجوومەنی وەزیرانی پاكستان رای گەیاند كە هێرشە مووشەكییەكەی هیندستان بۆ خاكی پاكستان شەڕفرۆشتنە و سوپای وڵاتەكەی راسپارد بۆ وەڵامدانەوەی.
بەپێی بەیاننامەیەكی نووسینگەی شەهباز شەریف سەرۆك وەزیرانی پاكستان، ئەو كارە نایاساییانەی هیندستان پێشێلكاریی زەقن بۆ سەروەریی پاكستان و یەكپارچەیی خاكەكەی، بەپێی یاسای نێودەوڵەتیش شەڕە، بۆیە هێزە چەكدارەكانی پاكستان بۆ وەرگرتنی رێوشوێنی گونجاو بۆ رووبەڕووبوونەوەیان راسپێردراوە.
بەر لەوە وەزارەتی دەرەوەی پاكستان كاربەڕێكەری باڵوێزخانەی هیندستانی لە ئیسلام ئاباد بانگهێشت كرد و یاداشتێكی ناڕەزایەتی لە دەسەڵاتدارانی پاكستان لە دژی هێرشەكانی شەوی رابردووی رادەست كرد، كە چەند ناوچەیەكی پاكستانی لە جامۆ و كشمیر گرتەوە و بووە هۆی برینداربوونی ژمارەیەك هاووڵاتی.
لای خۆیەوە لیژنەی ئاسایشی نەتەوەیی پاكستان كۆبوونەوەیەكی نائاسایی ساز كرد و داوای لێپرسینەوەی لەگەڵ هیندستان كرد لە دوای هێرشەكەی بۆ سەر پاكستان، لیژنەگە داوای لە كۆمەڵگەی نێودەوڵەتی كرد بۆ درككردن بە مەترسیداریی كارە بێپاساو و نایاساییەكەی هیندستان و لێپرسینەوەكردن لەگەڵی كە پێشێلكاریی زەقن بۆ نەریت و یاسا نێودەوڵەتییەكان.
شایەنی باسە شەوی رابردوو هێزە چەكدارەكانی هیندستان دەستی بە هەڵمەتێكی سەربازی لە دژی پاكستان كرد و نۆ ئامانجی لە بەشی پاكستانی هەرێمی كشمیر كردە ئامانج، وەك هیندستان باسی كرد، ئەوان ئەو بنكە و بارەگایانەیان كردووەتە ئامانج كە لەوێوە هێرش دەكرایە سەر هیندستان.
وەڵام بدەوه