لەلایەن سەرۆك وەزیرانی هەرێمی كوردستان ، بڕی پێنج ملیار دینار بۆ چەند پڕۆژەیەك لە شارۆكەی عەنكاوە تەرخان كرا

لەلایەن مەسروور بارزانی سەرۆك وەزیرانی هەرێمی كوردستان، بڕی پێنج ملیار دینار بۆ چەند پڕۆژەیەك لە شارۆكەی عەنكاوە تەرخان كرا.
ئەمڕۆ پێنجشەم 22ـی كانوونی یەكەم، وەزارەتی شارەوانی بڵاوی كردووەتەوە، مەسروور بارزانی سەرۆكی حكوومەتی هەرێمی كوردستان، ڕەزامەندی دا بە تەرخانكردنی زیاتر لە پێنج ملیار دینار بە مەبەستی جێبەجێكردنی پڕۆژەی قیرتاوكردن، دروستكردنی شۆستە و جێبەجێكردنی پڕۆژەی ئاو و ئاوەڕۆ لە شارۆكەی عەنكاوە لە پارێزگای هەولێر.
ساسان عەونی وەزیری شارەوانی و گەشتوگوزار لەبارەی گوژمەكە ڕای گەیاند، مەسروور بارزانی سەرۆكی حكوومەتی هەرێمی كوردستان، ڕەزامەندی داوە لەسەر خەرجكردنی گوژمەی پێنج ملیار و 500 ملیۆن دینار بەشێوەی نەختینە، لەسەر بودجەی وەبەرهێنانی وەزارەتی شارەوانی و گەشتوگوزار بە مەبەستی جێبەجێكردنی پڕۆژەی قیرتاوكردنی شەقامەكان، دروستكردنی شۆستە، گەیاندنی ئاو و دروستكردنی ئاوەڕۆ لە كەرتی 128ی عەنكاوە.
لەبارەی كاریگەرییەكانی ئەو گوژمەیە لەسەر پەرەپێدانی پڕۆژەكانی عەنكاوە گوتی، ئەو گوژمەیە دەبێتە هۆی پەرەپێدانی زیاتری پڕۆژە خزمەتگوزارییەكانی عەنكاوە، لەڕووی خزمەتگوزارییەوە شارۆكەكە هەنگاوێكی تر دەچێتە پێشەوە و ئاستی خزمەتگوزارییەكان تێیدا بەرز دەبێتەوە.