شاندی وەزاری پارتی دیموکراتی کوردستان و یەکێتی نیشتمانی کوردستان کۆدەبنەوە و "نیگەرانی"ـیەکانی ئەمدواییەی هەر دوولا گفتوگۆیان لەبارەیەوە دەکرێت.
پشتیوان سادق، سەرۆکی شاندی وەزاری پارتی لە حکومەتی هەرێمی کوردستان، "دوای تەواوبوونی کۆنگرەی 14ـی پارتی، لەگەڵ لایەنەکانی دیکە و لەوانە یەکێتی نیشتمانی کوردستان کۆدەبینەوە". ئەو، بەدیاریکراوی باسی لە رۆژی کۆبوونەوەیان لەگەڵ یەکێتی نەکرد.
کردەوە تیرۆریستییەکەی رۆژی 7ـی تشرینی یەکەم لە شاری هەولێر و داهاتی سنووری پاریزگای سلێمانی و هەڵەبجە لەگەڵ ئیدارە سەربەخۆکانی راپەڕین و گەرمیان، دوو پرسن کە یەکێتی لێی "نیگەرانە" و ئەو "نیگەرانی"ـیەی بە لایەنەکانی دیکەش راگەیاندووە.
بۆ رەواندنەوەی ئەو "نیگەرانی"ـیانە و ئاگاداربوونی زیاتری لایەنەکان لە وردەکارییەکانی ئەو دوو پرسە، شاندی وەزاری پارتی دیموکراتی کوردستان بە جیا لەگەڵ حزبی شیوعی، بزوتنەوەی گۆڕان، یەکگرتووی ئیسلامی کوردستان و کۆمەڵی دادگەری کۆبووەوە.
رۆژی 31ـی تشرینی یەکەم، شاندی وەزاری پارتی بە سەرۆکایەتی پشتیوان سادق، سەردانی کۆمەڵی دادگەری کرد و دوای تەواوبوونی کۆبوونەوەکە لە کۆنگرەیەکی رۆژنامەنووسیدا ئاشکرایکرد کە بەهۆی کۆنگرەی پارتی دیموکراتی کوردستان، بۆ ماوەیەکی کاتی سەردانی لایەنەکان ناکەن، بەڵام دوای کۆنگرە دەست بە سەردان و کۆبوونەوە لەگەڵ لایەنەکان دەکەنەوە.
هەروەها پشتیوان سادق لەگەڵ ئاماژەدان بە تیرۆرکردنی هاوکار عەبدوڵڵا جاف، ئەفسەری ئەنجوومەنی ئاسایشی هەرێمی کوردستان، گوتی: ئەنجامدانی کردەوەی تیرۆریستی لە هەولێر و کوردستان قبووڵکراو نییە، بۆیە ئاسایش و سەقامگیری بەلای حکومەتی هەرێمی کوردستانەوە هێڵی سوورە و نابێت هیچ کەسێک پەنا بۆ ئەو جۆرە کردەوانە ببات.
پشتیوان سادق هاوکات لەگەڵ دووپاتکردنەوەی هەماهەنگی و تەبایی و برایەتی لە نێو تیمی ئەنجوومەنی وەزیراندا رایگەیاند: حکومەتی هەرێمی کوردستان و سەرۆکوەزیران، بەیەک چاو سەیری هەموو ناوچە و شارەکانی کوردستان دەکات، هەر بۆیە پێویستە بە هەمان شێوەش ئاگاداری داهات و خەرجیی هەموو پارێزگاکان بێت.
وەڵام بدەوه