لەبارەی قەرزی کارەباوە ھاوڵاتییان ئاگادار دەکرێنەوە.

ئەو هاووڵاتییانەی کە لە ناوشاری هەولێر کارەبایان بڕدراوە، یان قەرزیان لەسەرە ئاگادار دەکرێنەوە دەست بە مامەڵە بکەن.

بەرێوبەرایەتیی دابەشکردنی کارەبای 2ی هەولێر لە ئاگادارییەکدا بڵاوی کردەوە: "ئاگاداریەک بۆ ھاووڵاتیانی سنووری بەرێوبەرایەتی دابەشکردنی کارەبای 2 ،ئەوانەی بە ھۆی قەرزی کارەباوە کارەبایان بڕدراوە یاخود قەرزی کارەبایان ھەیە رۆژی شەممە 2202/10/22، دەتوانن سەردانی بەشی فرۆشیاری ووزە/2 بکەن، مامەڵەکانیان رایی دەکرێت."

مانگی ڕابردوو بەختیار قاسم، بەڕێوەبەری گشتیی کارەبای هەولێر، ڕاگەیاند: "ئێستا هەر هاووڵاتییەک قەرزی کارەبای هەبێت، ئەوا بۆی دەکرێتە 12 پشک و قیست."

ئاماژەی بەوەش دا: "ئەگەر هاووڵاتییەک 500 هەزاری کارەبا قەرزار بێت، ئەوە بەڕێوەبەرە پەیوەندیدارەکان دەتوانن قەرزەکە دابەشی سەر 12 پشک یان کەمتر بکەن و ئێستاش لێخۆشبوونی 15%ی قەرزی کارەبا نەماوە."

بەختیار قاسم، ئاشکراشی کرد، بۆ ئاسانکاریی زیاتر بۆ هاووڵاتییان بۆ دانەوەی قەرزەکانیان، دەوام زیاد کراوە، گوتیشی: "دەوامی دوای نیوەڕۆیان تاوەکو کاتژمێر پێنجی ئێوارە بۆ بەشی فرۆشتنی وزە، درێژ کراوەتەوە، لە دەوامەكەماندا تاوەکو کاتژمێر 2:30 هەموو مامەڵەیەک بەڕێ دەکرێت، بەڵام دوای ئەوە تاوەکو پێنجی ئێوارە تەنیا کرێی کارەبا وەردەگیرێت، ئەوەش بۆ ئەوەیە هاووڵاتییان مامەڵەکانیان خێراتر ڕایی بکرێ و هەموو ئاسانکارییەکیشیان بۆ دەکەین."

بەپێی زانیارییەکان، لە هەولێر قەرزی هاوبەشانی کارەبا زیاتر لە 132 ملیار دینارە.