کورتەی هەواڵ:
لە ڕێکەوتی ٢٨ی تشرینی یەکەمەوە تا سەرەتای مانگی ١١، شەپۆلێکی ناسکی باران و بەفر عێراق و هەرێمی کوردستان دەگرێتەوە. شەپۆلەکە بەهۆی تێکەڵبوونی شێی زەریای ئەتڵەسی، دەریای سوور، دەریای سپی ناوەڕاست و بارستە هەوای ساردی جەمسەری باکوور دروست بووە و پێشبینی دەکرێت پلەکانی گەرما بە شێوەیەکی بەرچاو داببەزن.
مایەی هەواڵ (وردەکاری):
بە گوێرەی لێدوانی شارەزای بواری کەشناسی، سالار حاجی عەلی، لە ڕێکەوتی ٢٨ی تشرینی یەکەمەوە شەپۆلێکی باران و بەفر عێراق و هەرێمی کوردستان بەخۆوە دەبینێت و ماوەی کاریگەرییەکەی نزیکەی هەفتەیەک دەخایەنێت.
سەرچاوەی شەپۆلەکە: شێی ئەم شەپۆلە لە زەریای ئەتڵەسییەوە دەست پێدەکات، بەسەر کیشوەری ئەفریقا و دەریای سووردا تێدەپەڕێت و لەگەڵ شێی دەریای سپی ناوەڕاست و بارستە هەوای ساردی جەمسەری باکوور تێکەڵ دەبێت، کە ئەمەش دەبێتە هۆی دروستبوونی هەوری چڕ و بارانبارینی بەخوڕ.
قۆناغەکانی بڵاوبوونەوە: شەپۆلەکە لە ٢٨ی مانگ لە عێراقەوە دەست پێدەکات و پاشان دەگاتە سنوورەکانی هەرێمی کوردستان. سەرەتا لە ناوچە شاخاوییە سنوورییەکانی دهۆک و هەولێرەوە دەست پێدەکات و پاشان بەرەو سلێمانی، کەرکووک و هەڵەبجە بڵاودەبێتەوە، لەگەڵ بوونی هەورەبروسکە و زیادبوونی خێرایی با. لە قۆناغی دووەمدا کە لە سەرەتای مانگی ١١ دەست پێدەکات، بەهۆی دابەزینی بارستە هەوا ساردەکە، ڕێژەی بەفر و باران زۆر زیاد دەکات.
ڕێژەی باران و بەفر: پێشبینی دەکرێت ڕێژەی بارانبارین لە نێوان ١٥ بۆ ٥٠ میلیمەتر بێت، و لە هەندێک ناوچەی شاخاوی کە کەشی سارد و شێی چڕیان هەیە ڕەنگە بگەاتە ٧٠ میلیمەتر. هەروەها بەفر لە ناوچە شاخاوییە بەرزەکان و سنوورییەکان دەبارێت، و لە گەرمیانیش ڕێژەی باران باش دەبێت.
مەترسی و هۆشداری: بەهۆی چڕبوونەوەی لەناکاوی هەورەکان، ئەگەری بەرزبوونەوەی ئاو و دروستبوونی لافاو لە هەندێک ناوچەدا چاوەڕوان دەکرێت.
وەڵام بدەوه