بڕیاری لێخۆشبوون بۆ کارەبای ٢٤ کاتژمێری ئەم کەسانە دەرچوو

بڕیارەکە بۆ توێژێکی دیاریکراوە
پارێزگای هەڵەبجە بڵاویکردەوە، بە هەوڵی پارێزگاری هەڵەبجە، بڕیاری لێخۆشبوون بۆ کۆمەڵێک بەرکەوتەی چەکی کیمیایی لەپارەی کارەبای 24 کاتژمێری دەرچوو.
پارێزگای هەڵەبجە رایگەیاند، لە چوارچێوەی هەوڵە بەردەوامەکانی نوخشە ناسیح، پارێزگاری هەڵەبجە بۆ خزمەتکردنی کەسوکاری سەربەرزی شەهیدان و بەرکەوتووانی چەکی کیمیایی، بڕیاری لێخۆشبوون بۆ 18 هاووڵاتی کە بەركەوتەی چەكی كیمیاین، لە پارەی كارەبای 24 کاتژمێری، دەرچوو.
ئەوەشی روونکردووەتەوە، بڕیارەکە پاڵپشت بە نووسراوی ئەنجومەنی وەزیران و سەرۆكایەتیی دیوان و بە بڕیاری (ژمارە 12018 لە رێکەوتی 22ـی ئەیلوولی 2026) دەرچووە و ئەو 18 کەسە لەو رێکەوتەوە دەتوانن سودمەند بن لە بڕیارەکە.
ئاماژەی بەوەشکردووە، پارێزگاری هەڵەبجە سوپاس و پێزانینی ئاڕاستەی سەرۆکی حکومەت و جێگری سەرۆكی حكومەت و سەرۆکایەتی دیوانی ئەنجومەنی وەزیران کرد بۆ بەدەمەوەهاتن و پاڵپشتییان بۆ خزمەتکردنی بەرکەوتووانی چەکی کیمیایی لە  هەڵەبجە.