دڵنیایی بە بەکارهێنەرانی کۆڕەک تیلیکۆم دەدرێت

دڵنیایی دەدرێتە بەشداربووانی کۆڕەک تیلیکۆم؛ سیمکارتەکانتان لە هەرێمی کوردستان لەکار ناکەون
وەزارەتی گواستنەوە و گەیاندنی حکومەتی هەرێم دڵنیایی تەواو دەداتە بەشداربووانی تۆڕی پەیوەندییەکانی کۆڕەک تیلیکۆم کە سیمکارتەکانیان لەکار ناکەون و کۆمپانیاکە لە پێشکەشکردنی خزمەتگوزارییەکانی بەردەوام دەبێت.
لە لێدوانێکدا سەبارەت بە چارەنووسی سیمکارتەکانی کۆڕەک لە دوای کۆتایی ئەم مانگە، وەزیری گواستنەوە و گەیاندنی هەرێم ڕایگەیاند: "کۆڕەک تیلیکۆم یەکەمین کۆمپانیای پەیوەندییەکانە لە هەرێمی کوردستان و کۆمپانیایەکی نیشتمانی و کوردستانییە."
لە درێژەی قسەکانیدا ئاماژەی بەوە دا کە وەزارەتی گواستنەوە و گەیاندن بەردەوام بەرگری لە مافەکانی هاوڵاتیان دەکات و گوتی: "بەرژەوەندی هاوڵاتیانی ئێمە ئەولەوییەتی یەکەمە لای ئێمە، لەبەر ئەوەش کۆڕەک تیلیکۆم لە کوردستان بەردەوام دەبێت." بەم لێدوانەش کۆتایی بەو نیگەرانییانە هێندرا کە لای بەشداربووانی ئەو تۆڕە دروست ببوو سەبارەت بە ئەگەری وەستانی سیمکارتەکانیان.