بەرێز مەسرور بارزانی سەردانی بەغدا دەکات

​مەسرور بارزانی، سەرۆکی حکومەتی هەرێمی کوردستان، بڕیارە ڕۆژی شەممەی داهاتوو سەردانێکی فەرمی بۆ شاری بەغدای پایتەخت ئەنجام بدات، بە مەبەستی دیدار لەگەڵ سەرکردایەتیی نوێی عێراق.
​بەپێی زانیارییە سەرەتاییەکان، ئەم سەردانەی سەرۆکی حکومەتی هەرێمی کوردستان بۆ بەغدا، بە پلەی یەکەم بە مەبەستی پیرۆزباییکردنە لە عەلی فالح زەیدی بە بۆنەی وەرگرتنی متمانەی پەرلەمان و دەستبەکاربوونی وەک سەرۆکی نوێی ئەنجومەنی وەزیرانی عێراق.
​هاوکات، لە چوارچێوەی سەردانەکەدا مەسرور بارزانی لەگەڵ عەلی زەیدی و بەرپرسانی دیکەی حکومەتی فیدراڵ کۆدەبێتەوە، بۆ تاوتوێکردنی پەیوەندییەکانی نێوان هەولێر و بەغدا، بەتایبەتی دۆسیە هەڵپەسێردراوەکانی وەک بودجە، مووچەی فەرمانبەرانی هەرێم و دۆخی ئەمنی و سیاسیی ناوچەکە، بە ئامانجی گەیشتن بە لێکتێگەیشتنی نوێ لەگەڵ کابینە کاتییەکەی بەغدا.