وادوی کۆتاییهاتنی بارانبارین راگەیاندرا

زەکەریا کانی پاشایی، پێشبینیکاری کەشناسی ڕایگەیاند،  ئەمڕۆ دووشەممە هەرێمی کوردستان كەوتە ژێر کاریگەریی چڕبوونەوەی هەورە کەڵەکەبووەکان و دروستبوونی هەوری بەهێزی جۆری “سۆپەرسێڵ”، کە بارانی توند و تەرزەی لێ دەبارێت".
 بارانی بەهێز و هەوری سۆپەرسێڵ ئەم ناوچانەی گرتۆتەوە:
بەشێک لە پارێزگاکانی هەولێر و دهۆک.
پارێزگای سلێمانی، قەرەداغ و دەربەندیخان.
تەواوی ناوچەکانی گەرمیان (باکور، ناوەند و باشوری گەرمیان). پارێزگاکانی کەرکوک و هەڵەبجە
ئاماژە بەوەش دەدات، لەگەڵ دەستپێکردنی ئەم شەپۆلەدا، پلەکانی گەرمی ڕوویان لە نزمبوونەوە كردوە. هاوکات خێرایی با لە نێوان ١٠ بۆ ٢٢ کم لە کاتژمێرێکدایە و بە شێوەیەکی مامناوەند چالاک دەبێت.
بەپێی پێشبینییەکان، ئەم بارودۆخە ناسەقامگیرە تا ڕۆژی چوارشەممە بەردەوام دەبێت و دواتر کۆتایی پێ دێت. بۆ ڕۆژانی پێنجشەممە و هەینی، کەشوهەوا جێگیر دەبێت و گونجاو دەبێت بۆ چوونەدەرەوە و گەشت و سەیران.